തലശേരി: ന്യൂനപക്ഷ പിഎസ്‌സി ഉദ്യോഗാർഥികളുടെ ആശങ്കകൾ പരിഹരിക്കണമെന്ന് കെസിവൈഎം തലശേരി അതിരൂപത സമിതി ആവശ്യപ്പെട്ടു. ന്യൂനപക്ഷക്ഷേമ വകുപ്പിനു കീഴിൽ വിവിധ മത്സരപരീക്ഷകൾക്ക് പരിശീലനം നൽകുന്ന കോച്ചിംഗ് സെന്‍റർ ഫോർ മൈനോറിറ്റി യൂത്ത് (സിസിഎംവൈ) ജൂലൈ-ഡിസംബർ ബാച്ചിലേക്ക് ഉദ്യോഗാർഥികളിൽനിന്ന് അപേക്ഷ സ്വീകരിക്കുന്നതു സംബന്ധിച്ചുള്ള വിശദവിവരങ്ങൾ ലഭ്യമാക്കി ഉദ്യോഗാർഥികളിലെ ആശങ്ക പരിഹരിക്കണം.
അപേക്ഷകൾ സ്വീകരിക്കുമെന്ന് പറഞ്ഞിരുന്നെങ്കിലും ആർക്കാണ് അപേക്ഷ നൽകേണ്ടതെന്നും എങ്ങനെ അപേക്ഷിക്കണമെന്നുമുള്ള കാര്യത്തിൽ വ്യക്തതയില്ലാത്തതാണ് ഉദ്യോഗാർഥികളെ ആശയക്കുഴപ്പത്തിലാക്കുന്നത്. സ്റ്റേറ്റ് മൈനോറിറ്റി ഡിപ്പാർട്ട്മെന്‍റുമായി ബന്ധപ്പെട്ടപ്പോൾ ഏകീകൃതമായ ഒരു സംവിധാനം നിലവിലില്ലെന്നും അതത് ജില്ലാ കേന്ദ്രങ്ങളുമായി ബന്ധപ്പെടുകയല്ലാതെ മറ്റു മാർഗങ്ങളൊന്നുമില്ലെന്നാണ് അറിയിച്ചത്. കോച്ചിംഗ് സെന്‍ററുകളുമായി ബന്ധപ്പെട്ടപ്പോൾ കൃത്യമായ മറുപടി ലഭിക്കുന്നില്ലെന്നും കെസിവൈഎം ചൂണ്ടിക്കാട്ടി. കോവിഡ് പ്രോട്ടോകോൾ നിലനിൽക്കുന്നതുകൊണ്ടും ലോക് ഡൗൺ കഴിയാത്തതിനാലും ഉദ്യോഗാഥികൾക്ക് നേരിട്ട് കോച്ചിംഗ് സെന്‍ററുകളുമായി ബന്ധപ്പെടാൻ കഴിയാത്ത സാഹചര്യമാണ് നിലവിലുള്ളത്. അതിനാൽ കേരളത്തിലെ മുഴുവൻ ന്യൂനപക്ഷ കോച്ചിംഗ് സെന്‍ററുകളുടെയും ഇ-മെയിൽ വിലാസമോ അപേക്ഷകൾ സമർപ്പിക്കേണ്ട ലിങ്കുകളോ ഔദ്യോഗിക ന്യൂനപക്ഷ വെബ്സൈറ്റുകളിൽ പ്രസിദ്ധീകരിക്കണമെന്നും യോഗം അഭിപ്രായപ്പെട്ടു.
യോഗം കെസിവൈഎം അതിരൂപത ഡയറക്‌ടർ ഫാ. ജിൻസ് വാളിപ്ലാക്കൽ ഉദ്ഘാടനം ചെയ്തു. പ്രസിഡന്‍റ് വിപിൻ മാറുകാട്ടുകുന്നേൽ അധ്യക്ഷത വഹിച്ചു. ജനറൽ സെക്രട്ടറി അമൽ ജോയി കൊന്നക്കൽ, സംസ്ഥാന ട്രഷറർ എബിൻ കുമ്പുക്കൽ, വൈസ് പ്രസിഡന്‍റ് നീന പറപ്പള്ളി, ഡെപ്യൂട്ടി പ്രസിഡന്‍റ് ടോണി ജോസഫ്, സെക്രട്ടറി സനീഷ് പാറയിൽ, ട്രഷറർ ജിൻസ് മാമ്പുഴക്കൽ, ജോയിന്‍റ് സെക്രട്ടറി ഐശ്വര്യ കുറുമുട്ടം, ആനിമേറ്റർ സിസ്റ്റർ പ്രീതി മരിയ, സംസ്ഥാന സിൻഡിക്കറ്റംഗം ചിഞ്ചു വട്ടപ്പാറ എന്നിവർ പങ്കെടുത്തു.
ന്യൂനപക്ഷ പിഎസ്‌സി ഉദ്യോഗാർഥികളുടെ ആശങ്കകൾ പരിഹരിക്കണം: കെസിവൈഎം
