കോവിഡ് പ്രതിരോധത്തില് കത്തോലിക്കാസഭ നല്കിവരുന്ന സഹായവും പിന്തുണയും നിസ്തുലമാണെന്നും ഇനിയുള്ള ദിനങ്ങളിലും അതു തുടരണമെന്നും ആരോഗ്യമന്ത്രി കെ.കെ. ശൈലജ. പിഒസിയില് കെസിബിസി സംഘടിപ്പിച്ച ദ്വിദിന പഠനശിബിരത്തിന്റെ സമാപനച്ചടങ്ങ് ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി.
ആതുരശുശ്രൂഷയില് എക്കാലത്തും കത്തോലിക്കാസഭാസ്ഥാപനങ്ങള് മാതൃകയാണ്. സ്വകാര്യമേഖലയില്നിന്നുള്ള ചില സ്ഥാപനങ്ങള്, സര്ക്കാരിനോടു പലതും ആവശ്യപ്പെടുമ്പോള് കത്തോലിക്കാ ആശുപത്രികളെ മാതൃകയാക്കണമെന്നാണു താന് പറയാറുള്ളതെന്നു മന്ത്രി പറഞ്ഞു. കെസിബിസി അല്മായ കമ്മീഷന് സംഘടിപ്പിച്ച ഈ പഠനശിബിരം കേരളത്തിന്റെ വികസനതലത്തിലെ അടിസ്ഥാനപ്രശ്നങ്ങള് ചൂണ്ടിക്കാണിച്ചുവെന്നു കരുതുന്നുവെന്നും മന്ത്രി കൂട്ടിച്ചേര്ത്തു.
കേരളത്തിലെ ജനങ്ങളില് 12 ശതമാനം പേര്ക്കാണു കോവിഡ് ബാധയുണ്ടായത്. സംസ്ഥാനത്തെ ജനസാന്ദ്രത കണക്കിലെടുക്കമ്പോള്, ഈ മഹാമാരിയെ പ്രതിരോധിക്കുകയെന്നത് ഒരു ഭഗീരഥ പ്രയത്നമായിരുന്നു. സര്ക്കാരിനോടൊപ്പം ജനങ്ങളും ആരോഗ്യവകുപ്പു പ്രവര്ത്തകരും നിയമപാലകരുമെല്ലാം നല്കിയ സഹായസഹകരണങ്ങൾ മൂലമാണു കേരളത്തിന് ഈ മേഖലയില് നേട്ടം കൈവരിക്കാനായതെന്നും മന്ത്രി പറഞ്ഞു.
വികസനത്തിന്റെ സുപ്രധാന വേദിയാണ് ആരോഗ്യമേഖലയെന്നും രോഗപ്രതിരോധതലത്തില് ക്രൈസിസ് മാനേജ്മെന്റ് നയങ്ങളാണു മന്ത്രി കെ.കെ.ശൈലജ നടപ്പാക്കിയതെന്നും അനുഗ്രഹ പ്രഭാഷണം നടത്തിയ കെസിബിസി പ്രസിഡന്റും സീറോ മലബാര് സഭ മേജര് ആര്ച്ച്ബിഷപുമായ കര്ദിനാള് മാര് ജോര്ജ് ആലഞ്ചേരി പറഞ്ഞു. ഏതു മുന്നണി വന്നാലും ശൈലജ ടീച്ചര് തന്നെ ആരോഗ്യവകുപ്പ് മന്ത്രിയാകട്ടെയെന്നും കര്ദിനാള് ഫലിതരൂപേണ ആശംസിച്ചു. ആതുരശുശ്രൂഷാരംഗത്ത് ക്രിസ്തീയമായ കരുതലും സാന്ത്വനവും നടപ്പാക്കിയ ഭരണാധികാരിയാണു ശൈലജടീച്ചര് എന്നും മാർ ആലഞ്ചേരി കൂട്ടിച്ചേര്ത്തു.
കെസിബിസി അല്മായ കമ്മീഷന് ചെയര്മാന് ബിഷപ് മാര് ജോര്ജ് മഠത്തിക്കണ്ടത്തില് അധ്യക്ഷത വഹിച്ചു. ഹൈബി ഈഡന് എംപി, ഫാ. ജേക്കബ് ജി. പാലയ്ക്കാപ്പിള്ളി, അഡ്വ. ഷെറി ജെ. തോമസ്, ഷാജി ജോര്ജ്, അഡ്വ. ബിജു പറയന്നിലം, ആന്റ ണി നൊറോണ, വി.പി. മത്തായി, അഡ്വ. വര്ഗീസ് കോയിക്കര, ജെയിന് ആന്സില് ഫ്രാന്സിസ് എന്നിവര് പ്രസംഗിച്ചു.
വികസനം എല്ലാ തലത്തിലും എല്ലാ ഇടങ്ങളിലും എന്ന പേരിലുള്ള ദ്വിദിന പഠനശിബിരത്തില് ഏഴു സെഷനുകളിലായി ഏഴു സുപ്രധാനവിഷയങ്ങളെക്കുറിച്ച് 76 പേര് പ്രസംഗിച്ചു. പഠനശിബിരത്തില് നടന്ന ചര്ച്ചകളില് ഉരുത്തിരിഞ്ഞ അഭിപ്രായങ്ങളും നിര്ദേശങ്ങളും സമാഹരിച്ച് സര്ക്കാരിനും വിവിധ രാഷ്ട്രീയ പാര്ട്ടികള്ക്കും സമര്പ്പിക്കുമെന്നു കെസിബി.സി ഡെപ്യൂട്ടി സെക്രട്ടറി ജനറല് ഫാ. ജേക്കബ് പാലയ്ക്കാപ്പിള്ളിയും കെസിഎഫ് ജനറല് സെക്രട്ടറി അഡ്വ. വര്ഗീസ് കോയിക്കരയും പറഞ്ഞു.