മട്ടന്നൂർ: കണ്ണൂർ രാജ്യാന്തര വിമാനത്താവളത്തിൽനിന്ന് സ്വർണം പിടികൂടി. കർണാടക കുടക് സ്വദേശി അക്നാസ് മക്കി നസീറിൽനിന്നാണ് 23.66 ലക്ഷം രൂപ വിലമതിക്കുന്ന 489 ഗ്രാം സ്വർണം പിടികൂടിയത്. ഷാർജയിൽനിന്ന് കണ്ണൂരിലേക്കുള്ള ഇൻഡിഗോ വിമാനത്തിലെത്തിയതായിരുന്നു അക്നാസ് മക്കി നസീർ. കസ്റ്റംസിന്റെ ചെക്ക് ഇൻ പരിശോധനയിൽ സംശയം തോന്നിയതിനെ തുടർന്ന് കസ്റ്റഡിയിലെടുത്ത് പരിശോധിച്ചപ്പോഴാണ് സ്വർണം കണ്ടെത്തിയത്. പേസ്റ്റ് രൂപത്തിലുള്ള സ്വർണം രണ്ട് ഗുളികരൂപത്തിൽ മലദ്വാരത്തിൽ ഒളിപ്പിച്ചനിലയിലായിരുന്നു. പേസ്റ്റ് രൂപത്തിലുള്ള സ്വർണം പിടികൂടുമ്പോൾ 581 ഗ്രാം ഉണ്ടായിരുന്നുവെങ്കിലും വേർതിരിച്ചെടുത്തപ്പോൾ 489 ഗ്രാം സ്വർണമാണ് ലഭിച്ചത്. യാത്രക്കാരനെ അറസ്റ്റ് ചെയ്തു ജാമ്യത്തിൽ വിട്ടു. കൂടുതൽ അന്വേഷണം നടന്നുവരികയാണ്. കസ്റ്റംസ് അസി. കമ്മീഷണർ മുഹമ്മദ് ഫൈസ്, സൂപ്രണ്ടുമാരായ വി.പി.ബേബി, കെ.പി.സേതുമാധവൻ, കൂവൻ പ്രകാശൻ, ഇൻസ്പെക്ടർമാരായ ജുബർ ഖാൻ, ദീപക്, സഞ്ജീവ് ഗുപ്ത, ഹെഡ് ഹവിൽദാർ രാജൻ എന്നിവരുടെ നേതൃത്വത്തിലായിരുന്നു പരിശോധന.