ഭിന്നശേഷിക്കാരുടെ തൊഴില് സുരക്ഷിതത്വവും പുനഃരധിവാസവും സര്ക്കാര് ഉറപ്പുവരുത്തുമെന്ന് മന്ത്രി എം.വി. ഗോവിന്ദന്. സംസ്ഥാനത്തെ സര്ക്കാര് ഓഫീസുകള് ഭിന്നശേഷി സൗഹൃദമാക്കുമെന്നും അദ്ദേഹം പറഞ്ഞു. കണ്ണൂര് ജില്ലാ ശുഭയാത്ര ഇലക്ട്രോണിക് വീല്ചെയര് വിതരണം മാങ്ങാട്ടുപറമ്പ് കണ്ണൂര് ഗവ.എൻജിനീയറിംഗ് കോളജില് ഉദ്ഘാടനം ചെയ്യുകയായിരുന്നു അദ്ദേഹം. ഭിന്നശേഷിക്കാരായ താത്ക്കാലിക ജീവനക്കാരെ സ്ഥിരപ്പെടുത്താനുള്ള ആലോചനയിലാണെന്നും മന്ത്രി പറഞ്ഞു. അവര്ക്ക് അര്ഹമായത് കൊടുക്കുകയെന്ന കടമയാണ് ഇപ്പോള് സര്ക്കാര് നിര്വഹിക്കുന്നതെന്നും അദ്ദേഹം പറഞ്ഞു. പൊതുവിപണിയില് രണ്ട് ലക്ഷത്തോളം രൂപ വിലയുള്ളതാണ് ഒരു ഇലക്ട്രോണിക് വീല് ചെയര്. പാപ്പിനിശേരിയിലെ അഞ്ജുവിന് വീല് ചെയര് നല്കിയാണ് മന്ത്രി ഉദ്ഘാടനം നിര്വ്വഹിച്ചത്. 20 വീല്ചെയറുകളാണ് ചടങ്ങില് വിതരണം ചെയ്തത്. ആന്തൂര് നഗരസഭാ ചെയര്മാന് പി. മുകുന്ദന് അധ്യക്ഷത വഹിച്ചു. വി.സതീദേവി, കെ. പ്രകാശന്, കെ. മൊയ്തീന് കുട്ടി, ഡോ.വി.ഒ. രജനി എന്നിവര് പ്രസംഗിച്ചു.