മട്ടന്നൂര്: മട്ടന്നൂർ കിന്ഫ്ര വ്യവസായ പാര്ക്കിൽ 110 കെവി സബ്സ്റ്റേഷന്, അഡ്മിനിസ്ട്രേറ്റീവ് ബ്ലോക്ക് എന്നിവയുടെ തറക്കല്ലിടൽ അടുത്ത മാസം നടത്തുമെന്ന് കെ.കെ.ശൈലജ എംഎൽഎ അറിയിച്ചു. വൈദ്യുതി സബ് സ്റ്റേഷൻ നിർമിക്കുന്നതിനായി നൽകേണ്ട തുക കിൻഫ്ര കെഎസ്ഇബിക്ക് അടച്ചിട്ടുണ്ട്. ഒരു വർഷത്തിനകം സബ് സ്റ്റേഷന്റെ നിർമാണം പൂർത്തിയാക്കും. ഇതിനിടയിൽ തന്നെ താൽക്കാലികമായി വൈദ്യുതി ലഭ്യമാക്കി മറ്റു നിർമാണ പ്രവർത്തനങ്ങൾ നടത്തുമെന്നും അവർ പറഞ്ഞു. കോൺഫറൻസ് ഹാൾ, ഐടി സൊല്യൂഷൻ സെൻ്റർ, ഫുഡ് കോർട്ട് തുടങ്ങിയവ ഉൾപ്പെടുന്ന അഡ്മിനിസ്ട്രേറ്റീവ് ബ്ലോക്ക് കെട്ടിടമാണ് നിർമിക്കാൻ ഉദ്ദേശിക്കുന്നത്. ഇതിൻ്റെ രൂപരേഖ തയ്യാറാക്കി വരികയാണ്. 12 കോടി രൂപയാണ് കിൻഫ്ര കെട്ടിട നിർമാണത്തിനായി മാറ്റിവെക്കുന്നത്. കിൻഫ്ര വ്യവസായ പാർക്കിനായി നിലയിൽ 127 ഏക്കർ സ്ഥലം സർക്കാർ ഏറ്റെടുത്തിട്ടുണ്ട്. 50 ഏക്കറോളം സ്ഥലം ഏറ്റെടുക്കുന്ന നടപടികൾ അന്തിമഘട്ടത്തിലാണെന്നും കെ.കെ.ശൈലജ പറഞ്ഞു.