കണ്ണൂർ: ആറളം പഞ്ചായത്തിൽ നടന്ന ഉപതിരഞ്ഞെടുപ്പുമായി ബന്ധപ്പെട്ട് വീർപ്പാട് ആദിവാസി കോളനിയിലെ വോട്ടർമാരെ തട്ടിക്കൊണ്ടുപോയി തടങ്കലിൽ പാർപ്പിച്ച് ക്രൂരമായി മർദ്ദിച്ച സിപിഎം പ്രവർത്തകരെ എത്രയും പെട്ടെന്ന് അറസ്റ്റ് ചെയ്യണമെന്ന് ഡിസിസി പ്രസിഡന്റ് സതീശൻ പാച്ചേനി ആവശ്യപ്പെട്ടു. സംഭവം നടന്ന് ഒരാഴ്ച കഴിഞ്ഞിട്ടും പ്രതികളെ കുറിച്ചും തട്ടിക്കൊണ്ടുപോയ വാഹനത്തെക്കുറിച്ചും തടങ്കലിൽ പാർപ്പിച്ച സ്ഥലത്തെ കുറിച്ചും വ്യക്തമായ വിവരം ലഭിച്ചിട്ടും പ്രതികൾ നാട്ടിൽ സ്വൈര്യവിഹാരം നടത്തുമ്പോൾ പോലീസ് നോക്കുകുത്തിയായി നില്ക്കുന്നത് നാടിന് അപമാനകരമാണ്.
പോലീസിന്റെ സിപിഎം അനുകൂല നിലപാടിൽ പ്രതിഷേധിച്ചും കുറ്റക്കാരെ കണ്ടെത്തി നിയമത്തിനു മുന്നിൽ ഹാജരാക്കണമെന്നാവശ്യപ്പെട്ടും നാളെ കോൺഗ്രസ് കളക്ടറേറ്റ് ധർണ നടത്തുമെന്നും സതീശൻ പാച്ചേനി അറിയിച്ചു.