കണ്ണൂര്‍: കോവിഡ് രണ്ടാം തരംഗം രൂക്ഷമായ സാഹചര്യത്തില്‍ സിഎഫ്എല്‍ടിസിയാക്കിയ കണ്ണൂര്‍ സ്‌പോര്‍ട്‌സ് ഹോസ്റ്റലില്‍ കൂടുതല്‍ സൗകര്യങ്ങള്‍ ഒരുക്കാന്‍ ജില്ലാപഞ്ചായത്ത് യോഗത്തില്‍ തീരുമാനം. ജില്ലാ ആശുപത്രിയുടെ കീഴിലുള്ള സിഎഫ്എല്‍ടിസിയാണ് സ്‌പോര്‍ട്‌സ് ഹോസ്റ്റലിലേത്. ബി കാറ്റഗറിയില്‍ ഉള്‍പ്പെടുന്ന രോഗികള്‍ക്ക് ആവശ്യമായ കൂടുതല്‍ സൗകര്യങ്ങള്‍ ഇവിടെ ഏര്‍പ്പെടുത്തും. കോവിഡ് പ്രതിരോധ പ്രവര്‍ത്തനങ്ങളുമായി ബന്ധപ്പെട്ട് ജില്ലാ ആശുപത്രിക്കാവശ്യമായ അധിക സൗകര്യങ്ങള്‍ ഏര്‍പ്പെടുത്തുന്നതിനുള്ള പദ്ധതികള്‍ക്കും യോഗത്തില്‍ തീരുമാനമായി.
പുതിയ ഓക്‌സിജന്‍ പ്ലാന്‍റ് സ്ഥാപിക്കുന്ന പ്രവര്‍ത്തനം വേഗത്തിലാക്കും. ആശുപത്രിയുടെ ദൈനംദിന പ്രവര്‍ത്തനങ്ങള്‍ വിലയിരുത്തുന്നതിനും സംവിധാനമൊരുക്കും. കോവിഡ് പ്രതിരോധ പ്രവര്‍ത്തനങ്ങളുടെ ഭാഗമായി തദ്ദേശ സ്ഥാപനങ്ങളുടെ നേതൃത്വത്തില്‍ രോഗികള്‍ക്കാവശ്യമായ മാനസിക പിന്തുണ നല്‍കണമെന്നും യോഗം നിർദേശിച്ചു. നിര്‍മാണ പ്രവര്‍ത്തനങ്ങള്‍ ഏറ്റെടുത്ത് പ്രവൃത്തിയില്‍ അലംഭാവം കാട്ടുന്ന കരാറുകാരെ കരിമ്പട്ടികയില്‍ ഉള്‍പ്പെടുത്തി കര്‍ശന നടപടികള്‍ സ്വീകരിക്കാനും ജില്ലാ പഞ്ചായത്ത് യോഗം തീരുമാനിച്ചു.
നിര്‍മാണ പ്രവര്‍ത്തനങ്ങള്‍ സമയബന്ധിതമായി പൂര്‍ത്തീകരിക്കുന്നതില്‍ കരാറുകാര്‍ വീഴ്ച വരുത്തിയ പശ്ചാത്തലത്തിലാണിത്. പത്തംഗ എസ്പിസിഎ മാനേജ്‌മെന്‍റ് കമ്മിറ്റി, ആയുര്‍വേദ, ഹോമിയോ, അലോപ്പതി വിഭാഗങ്ങള്‍ക്ക് എച്ച്എംസികള്‍, ജില്ലാ സാക്ഷരതാ സമിതി എന്നിവ രൂപീകരിച്ചു. സ്പില്‍ ഓവര്‍ പദ്ധതികള്‍ ഉള്‍പ്പെടെ ജില്ലാ പഞ്ചായത്തിന്‍റെ 2021 -22 വാര്‍ഷിക പദ്ധതി യോഗം അംഗീകരിച്ചു. ടെന്‍ഡറുകള്‍ക്ക് അംഗീകാരം നല്‍കി. ജില്ലാപഞ്ചായത്ത് പ്രസിഡന്‍റ് പി.പി. ദിവ്യയുടെ അധ്യക്ഷതയില്‍ ഓണ്‍ലൈനായാണ് യോഗം നടന്നത്. വൈസ് പ്രസിഡന്‍റ് ബിനോയ് കുര്യന്‍, ക്ഷേമകാര്യ സ്ഥിരംസമിതി അധ്യക്ഷന്‍ വി.കെ. സുരേഷ് ബാബു, ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ കെ.കെ. രത്‌നകുമാരി, പൊതുമരാമത്ത് സ്ഥിരം സമിതി അധ്യക്ഷ ടി. സരള, വികസന സ്ഥിരം സമിതി അധ്യക്ഷ യു.പി. ശോഭ, സെക്രട്ടറി വി.ചന്ദ്രന്‍, ജില്ലാ പഞ്ചായത്തംഗങ്ങള്‍, ബ്ലോക്ക് പഞ്ചായത്ത് പ്രസിഡന്‍റുമാര്‍, നിര്‍വഹണ ഉദ്യോഗസ്ഥര് തുടങ്ങിയവര്‍ പങ്കെടുത്തു.
സ്‌പോര്‍ട്‌സ് ഹോസ്റ്റല്‍ സിഎഫ്എല്‍ടിസിയില്‍ ജില്ലാപഞ്ചായത്ത് സൗകര്യമൊരുക്കും
