തലശേരി: ക്രൈസ്തവ ന്യൂനപക്ഷം നേരിടുന്ന കടുത്ത വിവേചനങ്ങള്‍ അവസാനിപ്പിക്കാന്‍ ന്യൂനപക്ഷ വകുപ്പ് മുഖ്യമന്ത്രി ഏറ്റെടുക്കണമെന്നും അല്ലെങ്കില്‍ വകുപ്പിലേക്ക് ക്രൈസ്തവ വിഭാഗത്തില്‍ നിന്നുള്ള മന്ത്രിയെ നിയമിക്കണമെന്നുമുള്ള ആവശ്യം ശക്തമാകുന്നു. ഇതു സംബന്ധിച്ചു തലശേരി അതിരൂപത കെസിവൈഎം മുഖ്യമന്ത്രിക്ക് കത്തയച്ചുകൊണ്ടുള്ള ഇ-മെയില്‍ കാമ്പയിനു തുടക്കം കുറിച്ചു.
2008ല്‍ ന്യൂനപക്ഷ വകുപ്പ് നിലവില്‍ വന്നത് മുതല്‍ വകുപ്പ് മുസ്‌ലിം വിഭാഗത്തിന്‍റ കുത്തകയായിയായി മാറിയിരിക്കുകയാണ്. ഇതിന്‍റെ പരിണിതഫലം എന്ന നിലയില്‍ ന്യൂനപക്ഷ ക്ഷേമ പദ്ധതികളുടെ സിംഹഭാഗവും മുസ്‌ലിം വിഭാഗത്തിലേക്ക് ഒതുങ്ങിക്കൂടിയത് എല്ലാവര്‍ക്കും അറിവുള്ളതാണെന്നു കെസിവൈഎം തലശേരി അതിരൂപത പ്രസിഡന്‍റ് വിപിന്‍ ജോസഫ് മാറുകാട്ടുകുന്നേല്‍ പറഞ്ഞു.
80:20 എന്ന നിലയില്‍ ന്യൂനപക്ഷ സ്‌കോളര്‍ഷിപ്പുകള്‍ പാര്‍ശ്വവത്കരിച്ചതും ഇഡബ്ല്യുഎസ് സാമ്പത്തിക സംവരണത്തെ അട്ടിമറിക്കാന്‍ ശ്രമിച്ചതും മുസ്‌ലിം വിഭാഗത്തിലെ വിധവകള്‍, മതാധ്യാപകര്‍, പെണ്‍കുട്ടികള്‍ തുടങ്ങിയവര്‍ക്ക് മാത്രം നല്‍കുന്ന ആനുകൂല്യങ്ങള്‍ വകുപ്പ് ഒരു വിഭാഗത്തിന് തീറെഴുതി കൊടുത്തതിന്‍റെ ഫലമാണെന്നും കെസിവൈഎം പറയുന്നു. തലശേരി അതിരൂപതയിലെ മുപ്പതിനായിരത്തിലധികം വരുന്ന യുവജനങ്ങള്‍ പ്രസ്തുത വിഷയം ഉന്നയിച്ചുകൊണ്ട് മെയില്‍ കാമ്പയിന്‍റെ ഭാഗമാകും. കെസിവൈഎം തലശേരി അതിരൂപത ഡയറക്ടര്‍ ഫാ. ജിന്‍സ് വാളിപ്ലാക്കല്‍, ജനറല്‍ സെക്രട്ടറി അമല്‍ ജോയി കൊന്നയ്ക്കല്‍, ജിന്‍സ് മാമ്പുഴക്കല്‍, സനീഷ് പാറയില്‍, എബിന്‍ കുമ്പുക്കല്‍, ടോണി ചേപ്പുകാലായില്‍, സിസ്റ്റര്‍ പ്രീതി മരിയ സിഎംസി, നീന പറപ്പള്ളി, ചിഞ്ചു വട്ടപ്പാറ, ഐശ്വര്യ കുറുമുട്ടം എന്നിവരാണ് കാമ്പയിന് നേതൃത്വം നല്‍കുന്നത്.
ന്യൂനപക്ഷ വകുപ്പ് മുഖ്യമന്ത്രി ഏറ്റെടുക്കണമെന്ന് കെസിവൈഎം
