കണ്ണൂർ: കിടപ്പിലായ രോഗികൾക്ക് വീട്ടിലെത്തി കോവിഡ് വാക്സിൻ നൽകാനുള്ള നീക്കവുമായി കണ്ണൂർ ജില്ല പഞ്ചായത്ത്. കണ്ണൂരിലാണ് സംസ്ഥാനത്ത് ആദ്യമായി ഇത്തരമൊരു പദ്ധതിക്ക് തുടക്കമിടുന്നത്. കേവിഡ് വ്യാപനം ജില്ലയിൽ അതിരൂക്ഷമാകുന്ന സാഹചര്യത്തിലാണ് ഇത്തരമൊരു പദ്ധതി ജില്ല പഞ്ചായത്തിൻെറ നേതൃത്വത്തിൽ ആവിഷ്കരിച്ചതെന്ന് പ്രസിഡൻറ് പി.പി. ദിവ്യ പറഞ്ഞു. ജില്ലയിലെ 4500ഓളം കിടപ്പിലായ രോഗികൾക്ക് കോവിഡ് വാക്സിൻ നൽകാനാണ് ലക്ഷ്യമിടുന്നത്. രോഗികളുടെ വീട്ടിലെത്തിലാണ് വാക്സിൻ നൽകുക. ഇതിനായി പ്രത്യേകം രജിസ്റ്റർ ചെയ്യേണ്ടതില്ല. പാലിയേറ്റിവ് കെയർ യൂനിറ്റിൻെറ നേതൃത്വത്തിൽ ജില്ലയിലെ കിടപ്പിലായ രോഗികളുടെ കണക്കുകൾ ഇതിനകം ശേഖരിച്ചിട്ടുണ്ട്. ഇതുപ്രകാരമാണ് രോഗികളുടെ വീട്ടിലെത്തി കുത്തിവെപ്പ് നടത്തുക. ഇതിനായി രണ്ട് വാഹനങ്ങളും പ്രത്യേകം ആരോഗ്യപ്രവർത്തകരേയും സജ്ജീകരിക്കും. മേയ് രണ്ടിന് ശേഷം വാക്സിൻ നൽകൽ തുടങ്ങാനാണ് ജില്ല പഞ്ചായത്ത് അധികൃതരുടെ തീരുമാനം. ദേശീയ ആരോഗ്യ മിഷൻെറ സഹകരണത്തോടെ നടപ്പിലാക്കുന്ന പദ്ധതിയിൽ ആദ്യ ഡോസ് സ്വീകരിക്കാത്ത 60 വയസ്സിന് മുകളിലുള്ള രോഗികൾക്കാണ് വാക്സിൻ നൽകുക. ആദ്യഘട്ടത്തിൽ എല്ലാ പഞ്ചയാത്തുകളിലുമെത്തി വാക്സിൻ നൽകും. തുടർണ് മലയോര മേഖലകളിലെ ട്രൈബൽ കോളനികളിലെത്തി കിടപ്പിലായ രോഗികൾക്ക് വാക്സിൻ നൽകും. ജില്ല പഞ്ചായത്തിൻെറ തനതുഫണ്ട് ഉപയോഗിച്ചാണ് പദ്ധതി നടപ്പിലാക്കുന്നത്. പേരാവൂർ, ഇരിട്ടി ബ്ലോക്ക് പഞ്ചായത്തുകളിലെ ട്രൈബൽ കോളനികളിലെ കിടപ്പുരോഗികൾക്ക് പൂർണമായും കുത്തിവെപ്പ് നൽകും. തുടർന്ന് ജില്ലയിലെ അർബുദമടക്കമുള്ള മാരകരോഗം ബാധിച്ച് കിടപ്പിലായ ജില്ലയിലെ മുഴുവൻ രോഗികൾക്കും വീട്ടിലെത്തി വാക്സിൻ നൽകാനാണ് ഉദ്ദേശം. സമ്പൂർണ വാക്സിൻ ജില്ല എന്നതാണ് പദ്ധതികൊണ്ട് ഉദ്ദേശിക്കുന്നതെന്ന് പി.പി. ദിവ്യ പറഞ്ഞു. 60 വയസ്സ് കഴിഞ്ഞ കിടപ്പിലായ രോഗികൾക്കും വാക്സിൻ ലഭിച്ചാൽ മാത്രമേ ഈ ലക്ഷ്യം നടപ്പിലാക്കാനാകൂ. ജില്ല ആശുപത്രിയിൽ കോവിഡ് രോഗികൾക്ക് കൂടുതൽ സൗകര്യം ഒരുക്കുന്ന പദ്ധതികളും ജില്ല പഞ്ചായത്തിൻെറ നേതൃത്വത്തിൽ ആവിഷ്കരിക്കുന്നുണ്ടെന്ന് പി.പി. ദിവ്യ പറഞ്ഞു. കഴിഞ്ഞ വർഷം കോവിഡ് വ്യാപനകാലത്ത് ജില്ല പഞ്ചായത്തിൻെറ നേതൃത്വത്തിലൊരുക്കിയ കോൾ സൻെറർ സംവിധാനമടക്കം ഏറെ പ്രശംസ പിടിച്ചുപറ്റിയിരുന്നു.
കിടപ്പിലായവർക്ക് മൊബൈൽ വാക്സിനേഷനുമായി കണ്ണൂർ ജില്ല പഞ്ചായത്ത്
