പേരാവൂർ: കോവിഡ് രോഗികൾ താമസിക്കുന്ന വീടിന് മുകളിൽ വീണ കമുക് മുറിച്ചു മാറ്റി അഗ്നിരക്ഷാ സേന. വെള്ളർവള്ളിയിലെ കുടുംബത്തിനാണ് സഹായഹസ്തവുമായി പേരാവൂർ അഗ്നിശമന സേനാംഗങ്ങൾ എത്തിയത്.
ഇന്നലെ ഉണ്ടായ ശക്തമായ കാറ്റിലാണ് മരം വീണ് വീട് തകർന്നത്. ഓടുമേഞ്ഞ വീടായതിനാൽ ഓടുകൾ പൊട്ടി താഴെ വെള്ളംവീണ് ബുദ്ധിമുട്ടിലായി.കോവിഡ് രോഗികൾ താമസിക്കുന്ന വീടായതിനാൽ കേടുപാടുകൾ പരിഹരിക്കുന്നതിന് പലരേയും സമീപിച്ചെങ്കിലും ആരും സഹായിക്കാൻ തയാറായില്ല.
തുടർന്ന് പേരാവൂർ അഗ്നിശമന സേനാംഗങ്ങൾ സ്ഥലത്തെത്തിയാണ് കമുക് വെട്ടിമാറ്റി പൊട്ടിപോയ ഓടുകൾക്ക് പകരം ഓടുകൾ മേഞ്ഞ് സുരക്ഷിതമാക്കിയത്. പേരാവൂർ ഫയർ സ്റ്റേഷൻ അസി. സ്റ്റേഷൻ ഓഫീസർ പ്രദീപൻ പുത്തലത്ത്, സി.പി.വിജേഷ് , ആർ പി.ബെഞ്ചമിൻ, കെ.എ. സിജു, ആൽബിൻ ഏബ്രഹാം എന്നിവർ നേതൃത്വം നല്കി.