ഇരിട്ടി: ആറളം, കൊട്ടിയൂർ വന്യജീവി സങ്കേതങ്ങളിൽ നടന്ന ഇരുപതാമത് പക്ഷി സർവേ സമാപിച്ചു. ആറളം വൈൽഡ് ലൈഫ് ഡിവിഷനും മലബാർ നാച്ചുറൽ ഹിസ്റ്ററി സൊസൈറ്റിയും സംയുക്തമായി നടത്തിയ കണക്കെടുപ്പിൽ 145 ഇനം പക്ഷികളെയാണ് കണ്ടെത്തിയത്. ഇതിൽ 12 എണ്ണം പശ്ചിമഘട്ടത്തിൽ തനതായി കാണുന്ന പക്ഷികളാണ്. സർവേയ്ക്ക് ഇടയിൽ കണ്ടെത്തിയ കൊഴിക്കിളിയാണ് (Pied Thrush) പുതുതായി വന്യജീവി സങ്കേതത്തിൽ രേഖപ്പെടുത്തിയ പക്ഷി. ഇതോടെ ആറളം, കൊട്ടിയൂർ വന്യജീവി സങ്കേതങ്ങളിലായി 247 പക്ഷികളെയാണ് കഴിഞ്ഞ ഇരുപത് വർഷത്തിനിടയിൽ രേഖപ്പെടുത്തിയിട്ടുള്ളത്. കേരളത്തിൽ മറ്റൊരു സംരക്ഷിത മേഖലകളിലും പക്ഷികളെക്കുറിച്ചു ഇത്രയും നീണ്ട വർഷങ്ങളിലെ പഠനങ്ങൾ നടന്നിട്ടില്ല. ബസ്ര പ്രാപ്പിടിയൻ, പൊടി പൊന്മാൻ, ത്രിയംഗുലി മരംകൊത്തി, കിന്നരി പ്രാപ്പരുന്ത് എന്നിവയാണ് സർവേയിൽ രേഖപ്പെടുത്തിയ മറ്റ് പ്രധാന പക്ഷികൾ. ആറളം, കൊട്ടിയൂർ വന്യജീവി സങ്കേതങ്ങളിലെ ജീവനക്കാരും തൃശൂർ കേരള ഫോറസ്റ്ററി കോളജിലെ കുട്ടികളും 20 മറ്റ് പക്ഷി നിരീക്ഷിക്കരും പങ്കെടുത്ത സർവേ വൈൽഡ് ലൈഫ് വാർഡൻ എ.ഷജ്‌ന ഉദ്ഘാടനം ചെയ്തു. അസിസ്റ്റന്‍റ് വൈൽഡ് ലൈഫ് വാർഡൻ എൻ. അനിൽകുമാർ, പ്രശസ്ത പക്ഷിനിരീക്ഷകരായ സത്യൻ മേപ്പയൂർ, റോഷ്നാഥ് രമേശ്, ഡെപ്യൂട്ടി റേഞ്ച് ഓഫീസർ ജയേഷ് ജോസഫ് തുടങ്ങിയവർ പങ്കെടുത്തു.
ആറളം, കൊട്ടിയൂർ വന്യജീവി സങ്കേതങ്ങളിൽ നടന്ന ഇരുപതാമത് പക്ഷി സർവേ സമാപിച്ചു
