തലശേരി: തലശേരി മേഖലയിൽ പോലീസ് നടത്തിയ റെയ്ഡിൽ ബോംബ് നിർമാണ കേന്ദ്രം കണ്ടെത്തി. ഇല്ലത്ത് താഴയിൽ ആളൊഴിഞ്ഞ പറമ്പിലാണ് ബോംബ് നിർമാണ കേന്ദ്രം കണ്ടെത്തിയത്.ഒരു സ്റ്റീൽ ബോംബ്, 13 പുതിയ സ്റ്റീൽ കണ്ടെയ്നറുകൾ, ഒരു കിലോഗ്രാം വെടിമരുന്ന്, ആണി, പശ തുടങ്ങിയവ ഇവിടെ നിന്നും പോലീസ് കസ്റ്റഡിയിലെടുത്തു.
തലശേരി പോലീസും കണ്ണൂരിൽനിന്നുള്ള ബോംബ് സ്ക്വാഡും സംയുക്തമായാണ് പരിശോധന നടത്തിയത്. നിയമസഭാ തെരഞ്ഞെടുപ്പിന്റെ ഭാഗമായി കണ്ണൂർ സിറ്റി പോലീസ് കമ്മീഷണർ ആർ. ഇളങ്കോയുടെ നേതൃത്വത്തിൽ പരിശോധനകൾ തുടരുകയാണ്. തലശേരി സി.ഐ ഗോപകുമാർ, എസ്ഐമാരായ എ. അഷ്റഫ്, ജഗജീവൻ, എഎസ്ഐ സജീവൻ, ബോംബ് സ്ക്വാഡ് എസ്ഐമാരായ ടി.വി. ശശിധരൻ, അജിത്ത്, ബിനീഷ്, ലിനേഷ്, പ്രവീൺ, ശ്രീഗീത് എന്നിവരുടെ നേതൃത്വത്തിലായിരുന്നു പരിശോധന.
വരും ദിവസങ്ങളിലും പരിശോധന തുടരുമെന്ന് സിഐ ഗോപകുമാർ പറഞ്ഞു.