കണ്ണൂർ: തെരഞ്ഞെടുപ്പ് പെരുമാറ്റച്ചട്ടം നിലവില് വന്ന സാഹചര്യത്തില് സര്ക്കാര് സ്ഥലങ്ങളിലെയും പൊതുസ്ഥലങ്ങളിലെയും പ്രചാരണ സാമഗ്രികള് അടിയന്തരമായി നീക്കം ചെയ്യാന് ജില്ലാതെരഞ്ഞെടുപ്പ് ഓഫീസര് കൂടിയായ ജില്ലാ കളക്ടര് ടി.വി. സുഭാഷ് നിര്ദേശം നല്കി. ബന്ധപ്പെട്ട തദ്ദേശ സ്ഥാപന സെക്രട്ടറിമാര്, ഓഫീസ് മേധാവികള് എന്നിവര് ഇക്കാര്യത്തില് അടിയന്തര നടപടി കൈക്കൊള്ളണമെന്നും കളക്ടര് അറിയിച്ചു.
ബന്ധപ്പെട്ട രാഷ്ട്രീയ പാര്ട്ടികള് സ്വമേധയാ തന്നെ ഇവ നീക്കം ചെയ്യേണ്ടതാണ്. ആന്റി ഡീഫേസ്മെന്റ് സ്ക്വാഡുകള് സജീവമായി ഇവ നീക്കം ചെയ്യാന് രംഗത്തിറങ്ങണമെന്നും കളക്ടര് നിര്ദേശം നല്കി. സ്വകാര്യ സ്ഥലങ്ങളില് ബന്ധപ്പെട്ട ഉടമകളുടെ അനുവാദമില്ലാതെ സ്ഥാപിച്ച പ്രചാരണ സാമഗ്രികളും നീക്കം ചെയ്യാന് നടപടി സ്വീകരിക്കണം.