സർക്കാരിൽനിന്ന് അനുകൂല നടപടി ഉണ്ടാകുമെന്നാണ് ഉദ്യോഗാർഥികളുടെ പ്രതീക്ഷ. ഇതിനായി ഇന്നു വൈകുന്നേരംവരെ കാത്തിരിക്കാനാണ് സമരക്കാരുടെ തീരുമാനം. എന്നിട്ടും ഉത്തരവ് ലഭിച്ചില്ലെങ്കിൽ ഇന്നു വൈകുന്നേരംതന്നെ നിരാഹാര സമരം ആരംഭിക്കുമെന്ന് സമരക്കാരുടെ പ്രതിനിധി ലയ രാജേഷ് വ്യക്തമാക്കി.
കഴിഞ്ഞ ദിവസം സർക്കാരുമായി ഉദ്യോഗാർഥികൾ നടത്തിയ ചർച്ചയിൽ അവരുടെ ആവശ്യങ്ങൾ ചോദിച്ചറിയുകയാണുണ്ടായത്. ആവശ്യങ്ങൾ പരിഗണിക്കാമെന്നും സമരം നിർത്തണമെന്നുമായിരുന്നു സർക്കാർ നിർദേശം. എന്നാൽ ആ വാക്കുകൊണ്ടു മാത്രം സമരം നിർത്താൻ കഴിയില്ലെന്നാണ് ഉദ്യോഗാർഥികൾ പറയുന്നത്.
സിവിൽ പോലീസ് ഓഫീസർ, അധ്യാപക റാങ്ക് ലിസ്റ്റുകളിലെ ഉദ്യോഗാർഥികൾ ചർച്ചയ്ക്കു ശേഷവും സമരം തുടരുകയാണ്. പിഎസ്സി എൽജിഎസ് റാങ്ക് ഹോൾഡർമാരുടെ സമരം 27 ദിവസവും സിവിൽ പോലീസ് ഓഫീസർ റാങ്ക് ഹോൾഡർമാരുടെ സമരം 14 ദിവസവും പിന്നിട്ടു.
അതിനിടെ കെഎസ്ആർടിസി ഡ്രൈവർ പട്ടികയിലുള്ളവരും സെക്രട്ടേറിയറ്റിനു മുന്നിൽ സമരം ആരംഭിച്ചു.