മട്ടന്നൂർ: ഇന്‍റര്‍നെറ്റിന്‍റെ സാധ്യതകളെ പരമാവധി പ്രയോജനപ്പെടുത്തി ജീവിതസാഹചര്യം മെച്ചപ്പെടുത്താന്‍ ജനങ്ങള്‍ മുന്നോട്ടുവരണമെന്ന് മന്ത്രി ഇ.പി. ജയരാജന്‍. ഇ-കേരളം, വിജയവീഥി പദ്ധതികളുടെ സംസ്ഥാനതല ഉദ്ഘാടനം മട്ടന്നൂരിൽ നിര്‍വഹിച്ചു പ്രസംഗിക്കുകയായിരുന്നു അദ്ദേഹം. പ്രായഭേദമന്യേ എല്ലാവര്‍ക്കും ഇന്‍റര്‍നെറ്റിന്‍റെ സാധ്യതകള്‍ പരിചയപ്പെടാനും അത് ജീവിതത്തിന്‍റെ ഭാഗമാക്കാനുമുള്ള അവസരം ഇ-കേരളം പദ്ധതിയിലൂടെ ലഭിക്കും. പരീക്ഷകളില്‍ ഉന്നതവിജയം കരസ്ഥമാക്കാന്‍ യുവതലമുറയെ പ്രാപ്തരാക്കാന്‍ വിജയവീഥി പദ്ധതിയിലൂടെയും സാധിക്കും. കാലഘട്ടത്തിന് അനിവാര്യമായ സമൂഹത്തിന്‍റെ ക്ഷേമത്തിനായുള്ള രണ്ടു ബൃഹദ് പദ്ധതികളാണിതെന്നും മന്ത്രി പറഞ്ഞു.
മട്ടന്നൂര്‍ നഗരസഭ സിഡിഎസ് ഓഡിറ്റോറിയത്തില്‍ നടന്ന ചടങ്ങിൽ ഇ-കേരളം പദ്ധതിയുടെ ലോഗോ പ്രകാശനവും അംഗീകൃത വിജയവീഥി പഠനകേന്ദ്രങ്ങള്‍ക്കുള്ള സര്‍ട്ടിഫിക്കറ്റ് വിതരണവും മന്ത്രി നിര്‍വഹിച്ചു. മട്ടന്നൂര്‍ നഗരസഭ ചെയര്‍പേഴ്‌സണ്‍ അനിത വേണു അധ്യക്ഷയായിരുന്നു. വൈസ് ചെയര്‍മാന്‍ പി.പുരുഷോത്തമന്‍, കേരള സ്റ്റേറ്റ് റൂട്രോണിക്സ് ചെയര്‍പേഴ്‌സണ്‍ സി.എന്‍. സുഭദ്ര, എംഡി എസ്. സുരേഷ്‌കുമാര്‍, കെ. പദ്മകുമാര്‍, എസ്. വിനോദ്കുമാര്‍, നഗരസഭ സ്ഥിരംസമിതി അധ്യക്ഷന്മാര്‍, കൗണ്‍സലര്‍മാര്‍, സിഡിഎസ് പ്രതിനിധികൾ തുടങ്ങിയവർ പങ്കെടുത്തു.
വിവരസാങ്കേതിക വിദ്യയുടെ വളര്‍ച്ച സമൂഹത്തെ ഉന്നതിയില്‍ എത്തിക്കും: മന്ത്രി ജയരാജന്‍
