പാൽച്ചുരം: മദ്യവുമായെത്തിയ കണ്ടെയ്നർ ലോറി പാൽച്ചുരത്തിൽ അപകടത്തിൽപ്പെട്ട സംഭവത്തിൽ ലോറി ഡ്രൈവറെ പേരാവൂർ എക്സൈസ് കസ്റ്റഡിയിലെടുത്തു. ബംഗളൂരു സ്വദേശി കിരൺ കുമാറിനെ(26)യാണ് റൂട്ട് തെറ്റിച്ച് മദ്യം കൊണ്ടുവന്നതിന് കസ്റ്റഡിയിലെടുത്തത്. ഹൈദരാബാദ് വിമാനത്താവളത്തിൽ നിന്ന് കണ്ണൂർ വിമാനത്താവളത്തിലേക്ക് മദ്യവുമായി വന്ന ലോറിക്ക് കൂട്ടുപുഴ ചെക്ക്പോസ്റ്റ് വഴിയാണ് റൂട്ട് അനുവദിച്ചിരുന്നത്.
എന്നാൽ ബാവലി ചെക്ക് പോസ്റ്റ് വഴി വന്ന കണ്ടെയ്നർ ലോറി വ്യാഴാഴ്ച പാൽച്ചുരം വഴി പോകുന്നതിനിടെയാണ് ആശ്രമം വളവിൽ അപകടത്തിൽപ്പെട്ടത്. ലോറിയുടെ പകുതിയിലേറെ ഭാഗം റോഡരികിലെ കാട്ടിലേക്ക് തെന്നിമാറി മൺതിട്ടയിൽ ഇടിച്ചു നിന്നു. താഴെ വലിയ കൊക്കയാണ്. ഡ്രൈവർ അദ്ഭുതകരമായി രക്ഷപ്പെടുകയായിരുന്നു.
602 കെയ്സ് വിദേശമദ്യമായിരുന്നു ലോറിയിൽ ഉണ്ടായിരുന്നത്. കൂട്ടുപുഴ ചെക്പോസ്റ്റുവഴി ലോറി കടത്തിവിടാത്തതിനാലാണ് ഇതുവഴി വന്നതെന്നാണ് ഡ്രൈവർ പറയുന്നത്. സംഭവത്തിൽ അന്വേഷണം നടത്തി നടപടി സ്വീകരിക്കുമെന്ന് എക്സൈസ് അധികൃതർ പറഞ്ഞു.