പാൽച്ചുരം: പാൽച്ചുരം റോഡ് അറ്റകുറ്റപ്പണിക്കുള്ള നടപടിക്രമങ്ങൾ ആരംഭിച്ചു. ആദ്യഘട്ടത്തിൽ ലെവൽസ് എടുത്ത് റിപ്പോർട്ട് സമർപ്പിക്കുന്ന നടപടിയാണ് ഇന്നലെ നടന്നത്. കേരള റോഡ് ഫണ്ട് ബോർഡ് അസിസ്റ്റന്റ് എൻജിനിയർ പി.സജിത്തിന്റെ നേതൃത്വത്തിലാണ് ലെവൽസ് എടുക്കുന്ന നടപടി പൂർത്തിയാക്കിയത്. റിപ്പോർട്ട് സമർപ്പിച്ചശേഷം ഒരാഴ്ചയ്ക്കകം പ്രവൃത്തി ആരംഭിക്കും. ബോയ്സ് ടൗൺ മുതൽ അമ്പായത്തോട് വരെയുള്ള ആറു കിലോമീറ്റർ ഭാഗമാണ് അറ്റകുറ്റപ്പണി നടത്തുക.
റോഡിന് ഇരുവശവും കാടുവെട്ടി നീക്കി കോൺക്രീറ്റ് ചെയ്യുന്നതിനും പദ്ധതി തയാറാക്കിയിട്ടുണ്ട്. 69 ലക്ഷം രൂപയാണ് അറ്റകുറ്റപ്പണിക്കായി പൊതുമരാമത്ത് വകുപ്പ് വകയിരുത്തിയിരിക്കുന്നത്. അറ്റകുറ്റപ്പണി നടത്തുന്നതിന്റെ ഭാഗമായി മലയോര ഹൈവേയുടെ ഭാഗമായ മണത്തണ അമ്പായത്തോട് റോഡിലെ കുഴികളും അടയ്ക്കും. 15 ദിവസത്തോളം റോഡ് പൂർണമായും അടച്ചിട്ടാണ് പ്രവൃത്തി നടത്തുകയെന്ന് അധികൃതർ അറിയിച്ചിട്ടുണ്ട്. റോഡിന്റെ ശോച്യാവസ്ഥ പരിഹരിക്കണമെന്ന് ആവശ്യപ്പെട്ട് വിവിധ സംഘടനകളും പ്രദേശവാസികളും പ്രതിഷേധവുമായി രംഗത്തെത്തിയിരുന്നു.