കണ്ണൂർ: സിപിഎം കണ്ണൂർ ജില്ലാ സമ്മേളനം 10 മുതൽ 12 വരെ എരിപുരത്ത് നടക്കും. പ്രതിനിധി സമ്മേളനം 10 ന് രാവിലെ മുഖ്യമന്ത്രി പിണറായി വിജയൻ ഉദ്ഘാടനം ചെയ്യുമെന്ന് സിപിഎം ജില്ലാ സെക്രട്ടറി എം.വി. ജയരാജൻ പത്രസമ്മേളനത്തിൽ അറിയിച്ചു. സമ്മേളനത്തില് കോടിയേരി ബാലകൃഷ്ണന്, എ.വിജയരാഘവന്, ഇ.പി. ജയരാജന്, പി.കെ. ശ്രീമതി, എം.വി. ഗോവിന്ദന്, കെ.കെ. ശൈലജ, ആനത്തലവട്ടം ആനന്ദന് എന്നിവര് പങ്കെടുക്കും. തെരഞ്ഞെടുക്കപ്പെട്ട 250 പ്രതിനിധികളും 53 ജില്ലാ കമ്മിറ്റി അംഗങ്ങളും ജില്ലയില് നിന്നുമുള്ള സംസ്ഥാന കമ്മിറ്റി അംഗങ്ങളുമാണ് പങ്കെടുക്കുക. പത്തിന് രാവിലെ ഒൻപതിന് രജിസ്ട്രേഷന് നടക്കും. 9.30ന് പതാക ഉയര്ത്തും.
സമ്മേളനത്തിന് മുന്നോടിയായി ഇന്നു വൈകുന്നേരം നാലിന് എരിപുരം മുതല് പഴയങ്ങാടി വരെ വിളംബരജാഥ സംഘടിപ്പിക്കും. വൈകുന്നേരം അഞ്ചിന് പഴയങ്ങാടിയിൽ നടക്കുന്ന പുസ്തകോത്സവം കെ.കെ. ശൈലജ ഉദ്ഘാടനം ചെയ്യും. എട്ടിന് വൈകുന്നേരം അഞ്ചിന് നടക്കുന്ന കവിയരങ്ങ് സി.ജെ. കുട്ടപ്പൻ ഉദ്ഘാടനം ചെയ്യും. ഒൻപതിന് ഉച്ചകഴിഞ്ഞ് രണ്ടിന് കൊടിമര-പതാക-ദീപശിഖ ജാഥകള് ആരംഭിക്കും. കരിവെള്ളൂരില് നിന്നുള്ള പതാകജാഥ പി.കെ. ശ്രീമതി ഉദ്ഘാടനം ചെയ്യും. ടി.ഐ. മധുസൂദനനാണ് ജാഥാലീഡര്.
കാവുമ്പായിയില് കൊടിമര ജാഥ എം.വി. ജയരാജന് ഉദ്ഘാടനം ചെയ്യും. ടി.കെ. ഗോവിന്ദനാണ് ജാഥാലീഡര്. കണ്ണൂര് എകെജി പ്രതിമയില്വച്ച് ദീപശിഖാ റിലേ ഇ.പി. ജയരാജന് ഉദ്ഘാടനം ചെയ്യും.എന്.ചന്ദ്രന് നേതൃത്വം നല്കും. പതാകയും ദീപശിഖയും അത്ലറ്റുകൾ റിലേയായി കൊണ്ടുവരികയാണ്. മൂന്ന് ജാഥകളും വൈകുന്നേരം 5.30ന് സമ്മേളന നഗരിയിലെത്തി പതാക ഉയര്ത്തും.
പത്തിന് വൈകുന്നേരം അഞ്ചിന് നടക്കുന്ന മാധ്യമസെമിനാറില് വ്യവസായ മന്ത്രി പി. രാജീവ്, മാധ്യമപ്രവര്ത്തകന് എം.വി. നികേഷ്കുമാര് എന്നിവര് പങ്കെടുക്കും. 11 ന് വൈകുന്നേരം അഞ്ചിന്” മതനിരപേക്ഷത നേരിടുന്ന വെല്ലുവിളികള്’ എന്ന വിഷയത്തെ അടിസ്ഥാനമാക്കി സെമിനാര് നടക്കും. എ. വിജയരാഘവന്, അഡ്വ. പി.പി. ബഷീര്, ഫാ. ജോസഫ് കാവനാടി എന്നിവര് പങ്കെടുക്കും. 12ന് പൊതുസമ്മേളനം നടക്കും. പ്രതിനിധി സമ്മേളനം കെ .കുഞ്ഞപ്പ- പി. വാസുദേവന് നഗറിലും (മാടായി കോ-ഓപ്പ. റൂറല് ബാങ്ക് ഹാള്), പൊതുസമ്മേളനം ഇ.കെ. നായനാര് നഗറിലും (പഴയങ്ങാടി ബസ്സ്റ്റാൻഡ് പരിസരം) സെമിനാര് സി.വി. ദാമോദരന് നഗറിലും (പഴയങ്ങാടി ബസ് സ്റ്റാൻഡ് പരിസരം) ആണ് നടക്കുക.