കണ്ണൂർ: കൃഷിക്കാരുടെ ഉടമസ്ഥതയിലുള്ള തരിശോ കൃഷിയോഗ്യമല്ലാത്തതോ ആയ ഭൂമിയിൽ സൗരോർജനിലയങ്ങൾ സ്ഥാപിക്കാൻ പ്രഖ്യാപിച്ചിട്ടുള്ള പ്രധാൻമന്ത്രി കുസും പദ്ധതിയിലേക്കുള്ള രജിസ്ട്രേഷൻ ഈമാസം 31 വരെ. കർഷകരുടെ ഭൂമിയിൽ സ്വന്തം ചെലവിൽ സൗരോർജ നിലയങ്ങൾ സ്ഥാപിച്ച് ഉത്പാദിപ്പിക്കുന്ന വൈദ്യുതി മത്സരാധിഷ്ഠിത ദർഘാസിലൂടെ പരമാവധി മൂന്നുരൂപ 66 പൈസ നിരക്കിൽ കെഎസ്ഇബി വാങ്ങിക്കുന്നതും കർഷകരുടെ ഭൂമിയിൽ കെഎസ്ഇബി നിലയങ്ങൾ സ്ഥാപിച്ച് യൂണിറ്റിന് 20 പൈസ നിരക്കിൽ 25 വർഷത്തേക്ക് സ്ഥലവാടക നൽകുന്നതുമാണ് പദ്ധതി. ഒരു മെഗാവാട്ട് ശേഷിയുള്ള നിലയം സ്ഥാപിക്കാൻ പരമാവധി നാലേക്കർ സ്ഥലമാണ് ആവശ്യമുള്ളത്. ഏക്കറിന് ശരാശരി 50,000 രൂപ പ്രതിവർഷ വാടക കർഷകന് ലഭിക്കും. ചുരുങ്ങിയത് രണ്ടേക്കർ ഭൂമിയുള്ള കർഷകർക്ക് സ്വന്തം നിലയ്ക്കോ കൂട്ടായി ചേർന്നോ പദ്ധതിയിൽ പങ്കുചേരാം. താല്പര്യമുള്ളവർക്ക് www. kseb.in എന്ന വെബ്സൈറ്റ് വഴി രജിസ്റ്റർ ചെയ്യാം. പദ്ധതികളുടെ വിശദാംശങ്ങൾ അറിയാനും പദ്ധതിയിൽ അംഗമാകാനും കേരള സ്റ്റേറ്റ് ഇലക്ട്രിസിറ്റി ബോർഡ് ലിമിറ്റഡ് ഓഫീസുകളെ സമീപിക്കാം.
previous post