കണ്ണൂർ: പുതുതായി നിർമിച്ച ജില്ലാ കോൺഗ്രസ് കമ്മിറ്റി ഓഫീസ് സെപ്റ്റംബർ രണ്ടിന് രാവിലെ 10.30ന് രാഹുൽഗാന്ധി ഓൺലൈനായി നിർവഹിക്കുമെന്ന് ഡിസിസി പ്രസിഡന്റ് സതീശൻ പാച്ചേനി പത്രസമ്മേളനത്തിൽ അറിയിച്ചു. കോവിഡ് മാനദണ്ഡം പാലിച്ച് ആൾക്കൂട്ടം ഒഴിവാക്കിയാണ് പരിപാടി നടത്തുക. പുതിയ കെട്ടിടത്തിൽ വച്ച് നടത്തുന്ന ഉദ്ഘാടന ചടങ്ങിൽ കെപിസിസി പ്രസിഡന്റ് കെ. സുധാകരൻ എംപി, എഐസിസി സംഘടനാ ചുമതലയുള്ള ജനറൽ സെക്രട്ടറി കെ.സി. വേണുഗോപാൽ, പ്രതിപക്ഷനേതാവ് വി.ഡി. സതീശൻ എന്നിവർ പങ്കെടുക്കും. മുതിർന്ന നേതാക്കളായ എ.കെ. ആന്റണി, ഉമ്മൻചാണ്ടി, രമേശ് ചെന്നിത്തല, കെ. മുരളീധരൻ, വി.എം. സുധീരൻ, മുല്ലപ്പള്ളി രാമചന്ദ്രൻ, എം.എം. ഹസൻ, എ.കെ. രാഘവൻ, രാജ്മോഹൻ ഉണ്ണിത്താൻ തുടങ്ങിയ നേതാക്കൾ ഓൺലൈനായി ചടങ്ങിൽ സംബന്ധിക്കും.
ജില്ലയിലെ കോൺഗ്രസ് പ്രവർത്തകരുടെ ആഗ്രഹപൂർത്തീകരണമാണ് പുതിയ ഓഫീസ് ഉദ്ഘാടനം ചെയ്യുന്നതിലൂടെ സാക്ഷാത്കരിക്കപ്പെടുന്നതെന്ന് സതീശൻ പാച്ചേനി പറഞ്ഞു.ആറുകോടി രൂപയോളം രൂപ ചെലവഴിച്ചാണ് നിർമാണ പ്രവൃത്തി പൂർത്തിയാക്കിയിട്ടുള്ളത്. കേരളത്തിലെ ഏറ്റവും വലുതും ആധുനിക രീതിയിലുമുള്ള ഡിസിസി ഓഫീസാണ് സജ്ജീകരിച്ചിരിക്കുന്നത്. അന്തരിച്ച മുൻ ഡിസിസി പ്രസിഡന്റ് കെ. സുരേന്ദ്രന്റെ നേതൃത്വത്തിൽ കെട്ടിടത്തിന്റെ അടിത്തറയും താഴത്തെ നിലയിലുടെയും നിർമാണ പ്രവർത്തനങ്ങളുടെ സ്ട്രക്ച്ചറും പൂർത്തീകരിച്ചിരുന്നു.
6500 സ്ക്വയർഫീറ്റിൽ മൂന്നുനിലകളിലാണ് ഇപ്പോൾ പൂർണമായും നിർമാണ പ്രവൃത്തി പൂർത്തീകരിച്ചിരിക്കുന്നത്. കെട്ടിടത്തിൽ വിശാലമായ പാർക്കിംഗ് സൗകര്യം പ്രത്യേകമായി ഒരുക്കിയിട്ടുണ്ട്. താഴത്തെ നിലയിൽ ആധുനിക സജ്ജീകരണത്തോടുകൂടിയുള്ള കോൺഫറൻസ് ഹാളും പത്രസമ്മേളനത്തിന് സൗകര്യപ്രദമായ സജ്ജീകരണവും ഒരുക്കിയിട്ടുണ്ട്. എല്ലാ പോഷകസംഘടനകളുടെയും ഓഫീസുകൾ പ്രവർത്തിക്കാൻ സൗകര്യപ്രദമായ റൂമുകളും നവമാധ്യമ ഇടപെടലുകൾക്ക് ഐടി സംബന്ധമായ ആവശ്യങ്ങൾക്കും ഉപകരിക്കുന്ന പ്രത്യേക റൂമും കെട്ടിടത്തിലുണ്ട്.
കെപിസിസി പ്രസിഡന്റ് കെ. സുധാകരന് ക്യാന്പ് ഓഫീസും ജില്ലാ കോൺഗ്രസ് കമ്മിറ്റി അധ്യക്ഷന്റെ ഓഫീസ് റൂമും താഴത്തെ നിലയിൽ പ്രവർത്തിക്കും. റിസപ്ഷൻ കൗണ്ടറും അടുക്കളയും ഗ്രൗണ്ട് ഫ്ളോറിൽ ഒരുക്കിയിട്ടുണ്ട്. ഒന്നാംനിലയിൽ ആയിരം പേർക്ക് ഇരിക്കാവുന്ന വിശാലമായ ഓഡിറ്റോറിയവും ആധുനിക ലൈബ്രറി സൗകര്യവും ഒരുക്കിയിട്ടുണ്ട്. അതിഥികൾക്ക് താമസിക്കാനുള്ള മുറികളും ഒന്നാംനിലയിൽ സജ്ജമാക്കി. രാഹുൽഗാന്ധിയുടെ നേരിട്ടു പങ്കെടുക്കാനുള്ള സമയം ലഭിക്കാൻ താമസിച്ചതാണ് ഉദ്ഘാടനത്തിന് കാലതാമസം നേരിട്ടതെന്ന് പാച്ചേനി പറഞ്ഞു.
ഓഫീസ് നിർമാണവുമായി ബന്ധപ്പെട്ട് കഴിഞ്ഞ കാലങ്ങളിലുണ്ടായിരുന്ന മുഴുവൻ ബാധ്യതകളും തീർത്തിട്ടുണ്ട്. നിലവിലുള്ള സാന്പത്തിക ബാധ്യത തീർക്കാൻ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ ധനസമാഹരണവും നടത്തുന്നുണ്ട്. ഡിസിസി നേതാക്കളായ കെ.സി. മുഹമ്മദ് ഫൈസൽ, പി. മാധവൻ എന്നിവരും പത്രസമ്മേളനത്തിൽ പങ്കെടുത്തു.
previous post