ഇരിട്ടി: കർണാടകയിൽ നിന്ന് ഓണപ്പൂക്കളുടെ മറവിൽ കേരളത്തിലേക്ക് കടത്തുകയായിരുന്ന നിരോധിത ലഹരി ഉത്പന്നങ്ങൾ ഇരിട്ടി പോലീസ് പിടികൂടി. 14,000 പായ്ക്കറ്റ് ഹാൻസ്, കൂൾ ലിപ്പ് എന്നീ നിരോധിത പുകയില ഉത്പന്നങ്ങളാണ് ഇരിട്ടി പ്രിൻസിപ്പൽ എസ്ഐ ദിനേശൻ കൊതേരിയുടെ നേതൃത്വത്തിൽ നടന്ന വാഹന പരിശോധനക്കിടെ പിടികൂടിയത്. കർണാടകയിൽ നിന്ന് കേരളത്തിലേക്ക് പൂക്കൾ കൊണ്ടുവരികയാണെന്ന വ്യാജേന പൂക്കൾക്കിടയിൽ ഇവ ഒളിപ്പിച്ച് കടത്തുകയായിരുന്നു.
കൂട്ടുപുഴയിലെ ആർടിഒ ചെക്ക് പോസ്റ്റ്, കിളിയന്തറയിലെ എക്സൈസ് ചെക്ക് പോസ്റ്റ് എന്നിവിടങ്ങളിലെ പരിശോധനക്ക് ശേഷമാണ് വാഹനം ഇരിട്ടിയിലെത്തിയത്.
വാഹനത്തിലുണ്ടായിരുന്ന കണ്ണവം സ്വദേശി കെ അബ്ദുൾ നാസർ (45), മാനന്തേരി സ്വദേശികളായ പി.കെ.സജീർ(34), എം. അഷ്റഫ്(32) എന്നിവരെ പോലീസ് കസ്റ്റഡിയിലെടുത്തു. ഇരിട്ടി പോലീസ് സ്റ്റേഷനു മുന്നിൽ നടന്നു വരുന്ന വാഹന പരിശോധനയ്ക്കിടെയാണ് ഇവർ പിടിയിലാകുന്നത്.
നേരത്തെ പച്ചക്കറിയുടെ മറവിൽ മദ്യവും ലഹരി വസ്തുക്കളും കടത്തിയതും ഇരിട്ടി പോലീസ് പിടികൂടിയിരുന്നു.
പൂക്കളുടെ മറവിൽ കടത്തിയ ലഹരിവസ്തുക്കൾ പിടികൂടി
