സംസ്ഥാനത്ത് കുട്ടികള്‍ക്കെതിരേയുള്ള അതിക്രമങ്ങള്‍ വര്‍ധിക്കുന്നതിനിടയിലും ചൈല്‍ഡ് ലൈന്‍ ഹെല്‍പ്‌ലൈന്‍ നമ്പര്‍ നിശ്ചലം. പ്രായപൂര്‍ത്തിയാകാത്ത കുട്ടികള്‍ക്ക് സംരക്ഷണവും പരിചരണവും ഉറപ്പുവരുത്തുന്നതിനായി 24 മണിക്കൂറും പ്രവര്‍ത്തിക്കും വിധം ആരംഭിച്ച ഹെല്‍പ്‌ലൈന്‍ നമ്പറാണ് പ്രവര്‍ത്തനരഹിതമായത്.
മൊബൈലില്‍ 1098ലേക്ക് വിളിച്ചാല്‍ നിലവിലില്ലെന്ന അറിയിപ്പാണു ലഭിക്കുന്നത്. ലാന്‍ഡ് ലൈനില്‍ ബന്ധപ്പെട്ടാല്‍ കോവിഡുമായി ബന്ധപ്പെട്ടുള്ള അറിയിപ്പും ലഭിക്കുന്നുണ്ട്. എന്നാല്‍ ഫോണ്‍ എടുക്കാന്‍ ആരുമില്ലാത്ത സ്ഥിതിയാണ്. പൊതു ഇടങ്ങളിലും മറ്റും വ്യാപകമായി പ്രദര്‍ശിപ്പിച്ച ഹെല്‍പ്‌ ലൈന്‍ നമ്പറാണിത്.
കുട്ടികളില്‍നിന്നോ മറ്റു ബന്ധപ്പെട്ടവരില്‍നിന്നോ ഫോണില്‍ പരാതി ലഭിച്ചാല്‍ ഒരു മണിക്കൂറിനുള്ളില്‍ സ്ഥലത്തെത്തി കുട്ടിയെ ഏറ്റെടുക്കുകയും അടുത്തുള്ള പോലീസ് സ്‌റ്റേഷനില്‍ പരാതി നല്‍കുകയുമാണ് ചൈല്‍ഡ് ലൈന്‍ പ്രവര്‍ത്തകരുടെ ചുമതല. എന്നാല്‍ ഇന്നലെ രാവിലെ മുതല്‍ തുടര്‍ച്ചയായി ഈ നമ്പറില്‍ ബന്ധപ്പെട്ടുവെങ്കിലും പ്രവര്‍ത്തനരഹിതമാണ്. കോവിഡിന്‍റെ മറവില്‍ ഇതരസംസ്ഥാനങ്ങളില്‍നിന്നു കുട്ടികളെ വ്യാപകമായി എത്തിക്കുന്നുണ്ടെന്ന് വിവിധ രഹസ്യാന്വേഷണ വിഭാഗങ്ങൾ മുന്നറിയിപ്പു നല്‍കിയിരുന്നു.
ജില്ലയില്‍ രണ്ടാഴ്ചയ്ക്കുള്ളില്‍ അഞ്ചു കുട്ടികളെ റെയില്‍വേ പോലീസ് കണ്ടെത്തുകയും ചെയ്തിരുന്നു. തമിഴ്‌നാട്, ജാര്‍ഖണ്ഡ്, ബിഹാര്‍, ഒഡീഷ, ആസാം തുടങ്ങിയ സംസ്ഥാനങ്ങളില്‍നിന്നു കുട്ടികളെ ധാരാളമായി ഇവിടേക്ക് എത്തിക്കുന്നുണ്ട്. ട്രെയിന്‍ മാര്‍ഗമല്ലാതെയും കുട്ടികളെ കൊണ്ടുവരുന്നുണ്ട്. പ്രായപൂര്‍ത്തിയാവാത്ത കുട്ടികളും ഈ നമ്പറിനെ ആശ്രയിക്കാറുണ്ട്.