കണ്ണൂര്‍: കുടുംബശ്രീയുമായി കൈകോര്‍ത്ത് ജില്ലയില്‍ ഡോര്‍ ഡെലിവറി സംവിധാനവുമായി സപ്ലൈകോ. സപ്ലൈകോ വഴി കിട്ടിക്കൊണ്ടിരുന്ന എല്ലാ സാധനങ്ങളും വീട്ടിലിരുന്ന് ഓര്‍ഡര്‍ ചെയ്യാം. ഫോണോ,വാട്‌സ് ആപ്പോ വഴി ഓര്‍ഡര്‍ ചെയ്താല്‍ സാധനങ്ങൾ കുടുംബശ്രീ പ്രവര്‍ത്തകര്‍ വീടുകളില്‍ എത്തിക്കും. നിലവില്‍ സബ്‌സിഡിയുള്ള സാധനങ്ങള്‍ക്ക് ഹോം ഡെലിവറി ലഭ്യമല്ല. എന്നാല്‍ വിപണി വിലയേക്കാള്‍ കുറഞ്ഞനിരക്കിലാണ് സാധനങ്ങള്‍ ഉപഭോക്താക്കള്‍ക്ക് നല്‍കുക. ഉച്ചവരെ ഓര്‍ഡര്‍ സ്വീകരിച്ച് ഉച്ചയ്ക്ക് ശേഷമാണ് വിതരണം.
അഞ്ച് കേന്ദ്രങ്ങളാണ് ഹോം ഡെലിവറി സംവിധാനത്തിനായി സജ്ജമായിട്ടുള്ളത്. കണ്ണൂര്‍ ഡിപ്പോ പരിധിയിലെ പ്യൂപ്പിള്‍ ബസാര്‍: 9446668537, തലശേരി ഡിപ്പോ പരിധിയിലെ ഹൈപ്പര്‍ മാര്‍ക്കറ്റ്: 9495452220, എസ്എസ്എം ഇരിട്ടി: 9946582340, തളിപ്പറമ്പ് ഡിപ്പോ പരിധിയിലെ എസ്എസ്എം: 8086596571, 9744117387, എസ്എസ്എം മാതമംഗലം 9539421650, 8606531891 എന്നീ നമ്പറുകളിലേക്കാണ് വേണ്ട സാധനങ്ങളുടെ ലിസ്റ്റ് വാട്‌സ് ആപ്പായി അയയ്‌ക്കേണ്ടത്.ഡെലിവറി ചാര്‍ജായി നിശ്ചിത തുക ഈടാക്കും. വിതരണ കേന്ദ്രങ്ങളില്‍ നിന്ന് രണ്ട് കിലോ മീറ്റര്‍ പരിധിയില്‍ 40 രൂപയും അഞ്ച് കിലോമീറ്റര്‍ വരെ 50 രൂപയും അഞ്ച് കിലോമീറ്ററിന് മുകളില്‍ 10 കിലോ മീറ്റര്‍ വരെ 100 രൂപയുമാണ് ഡെലിവറി ചാര്‍ജ്. ഡെലിവറി ചാര്‍ജ് ഉള്‍പ്പെടെയുള്ള ബില്ലാണ് ഉപഭോക്താവിന് നല്‍കുക.