കണ്ണൂര്: കോവിഡ് പ്രതിരോധത്തിന്റെ ഭാഗമായി സംസ്ഥാന തലത്തില് ലോക്ഡൗണ് പ്രഖ്യാപിച്ച സാഹചര്യത്തില് ജനങ്ങള്ക്ക് താങ്ങാകാന് കോള് സെന്ററുമായി കണ്ണൂര് കോര്പറേഷന്. ലോക്ഡൗണ് വേളയില് ജനങ്ങള്ക്ക് അവശ്യസാധനങ്ങളുടെ ലഭ്യത ഉറപ്പുവരുത്തുകയെന്ന ലക്ഷ്യത്തോടെ കോര്പറേഷന്റെ നേതൃത്വത്തില് കോള് സെന്റര് പ്രവര്ത്തനം തുടങ്ങി.
അത്യാവശ്യ മരുന്നുകള്, വീട്ടാവശ്യങ്ങള്ക്കുള്ള മത്സ്യവും മാംസവും ഉള്പ്പെടെയുള്ള അവശ്യസാധനങ്ങള്, കോവിഡ് രോഗികള്ക്കുള്ള സഹായം തുടങ്ങിയവ മുടക്കമില്ലാതെ ലഭ്യമാക്കുന്നതിനുള്ള സംവിധാനം കോര്പറേഷന് കോള് സെന്റര് വഴി ഒരുക്കിയിട്ടുണ്ട്. കോര്പറേഷന് പരിധിലുള്ളവര്ക്കാണ് നിലവില് ഇതിന്റെ സേവനം ലഭിക്കുക. കോര്പറേഷന് കെട്ടിടത്തില് 24 മണിക്കൂറും പ്രവര്ത്തിക്കുന്ന ഹെല്പ്പ് ഡെസ്ക്കില് മൂന്ന് ഷിഫ്റ്റുകളിലായി അഞ്ചു ജീവനക്കാരെ വീതം ജോലിക്ക് നിയമിച്ചിട്ടുണ്ട്. ആവശ്യക്കാര് സാധനങ്ങള്ക്കായി ഫോണില് വിളിച്ച് പറയുന്ന മുറയ്ക്ക് അത് രേഖപ്പെടുത്തി ബന്ധപ്പെട്ട വാര്ഡ് കൗണ്സിലര്ക്ക് ലിസ്റ്റ് കൈമാറുകയാണ് ചെയ്യുന്നത്. ഓരോ വാര്ഡ് കൗണ്സിലരുടെ നേതൃത്വത്തില് ആറു പേരടങ്ങുന്ന സന്നദ്ധപ്രവര്കരുടെ സംഘം ഇവ സമാഹരിച്ച് വീടുകളില് എത്തിച്ച് നല്കും. ഹെല്പ് ഡെസ്ക്കില് സജ്ജമാക്കിയ അഞ്ചു മൊബൈല് നമ്പറില് ജനങ്ങള്ക്ക് ബന്ധപ്പെടാം. ഉദ്യോഗസ്ഥരെ കൂടാതെ ഒരു സ്ഥിരം സമിതി അധ്യക്ഷന്റെ നേതൃത്വത്തില് കൗണ്സിലര്മാരും ഹെല്പ്പ് ഡെസ്ക്കില് എല്ലാദിവസവും ഉണ്ടാവും. കോര്പറേഷന് പരിധിയിലെ കോവിഡ് രോഗികള്ക്കും മറ്റ് രോഗമുള്ളവര്ക്കും അടിയന്തര ചികിത്സ ലഭിക്കുന്നതിനായി ഏതെല്ലാം സര്ക്കാര് – സ്വകാര്യ ആശുപത്രികളില് കിടക്കകളുടെയും വെന്റിലേറ്റര്, ഓക്സിജന് ലഭ്യത എന്നിവ സംബന്ധിച്ചുള്ള വിവരങ്ങളും ലഭിക്കും. രോഗികള്ക്ക് ആശുപത്രികള് എത്തിച്ചേരുന്നതിന് ആംബുലന്സ് വാഹന സൗകര്യങ്ങളും ഏര്പ്പാടാക്കിയിട്ടുണ്ട്. ഇതിനായി ആംബുലന്സ് ഉള്പ്പെടെ ആറ് വാഹനങ്ങള് കോര്പറേഷന് തയാറാക്കിയിട്ടുണ്ട്.
സാധനങ്ങള്ക്കും സേവനങ്ങള്ക്കുമായി കോള് സെന്ററിലെ 8075195462, 8075464303, 8075441507, 7012841616 എന്നീ നമ്പറുകളിലേക്ക് വിളിക്കാം. മുരുന്നുകള് ലഭിക്കുന്നതിന് ഡോക്ടറുടെ കുറിപ്പ് ഉള്പ്പെടെയുള്ള വിവരങ്ങള് 8075333370 എന്ന നമ്പറിലേക്ക് വാട്സ് ആപ്പ് സന്ദേശം അയച്ചാല് മതിയാകും. ഇതേ മാതൃകയില് ജില്ലയിലെ നഗരസഭകളിലും ഗ്രാമപഞ്ചായത്തുകളിലും ഹോം ഡെലിവറി സംവിധാനങ്ങള് സജ്ജമാക്കിയിട്ടുണ്ട്. വാര്ഡ് അംഗങ്ങളുടെ നേതൃത്വത്തില് വോളണ്ടിയര് സേവനം ഉപയോഗപ്പെടുത്തിയാണ് ഇവിടങ്ങളില് അവശ്യ സാധനങ്ങള് വീടുകളിലെത്തിക്കുന്നത്.