കണ്ണൂര്: ജില്ലാ പോലീസ് മേധാവി (റൂറൽ) നവനീത് ശര്മയുടെ പേരിലും വ്യാജ ഫേസ്ബുക്ക് അക്കൗണ്ട്. ജില്ലാ പോലീസ് കമ്മീഷണര് കണ്ണൂര് റൂറല് എന്നപേരിലാണ് വ്യാജ ഫേസ്ബുക്ക് അക്കൗണ്ട് ഉണ്ടാക്കിയിരിക്കുന്നത്. നവനീത് ശര്മയാണ് തന്നെയാണ് തന്റെ ഒറിജിനല് ഫേസ്ബുക്ക് അക്കൗണ്ടില് ഇക്കാര്യം പോസ്റ്റ് ചെയ്തത്. ഒരേ പ്രൊഫൈല് ചിത്രം ഉപയോഗിച്ചാണ് രണ്ടാമത്തെ അക്കൗണ്ടും ഉണ്ടാക്കിയിരിക്കുന്നത്. സൈബര് സെല് മുഖേന വ്യാജ അക്കൗണ്ട് ഉണ്ടാക്കിയ ആളെ തിരിച്ചറിഞ്ഞിട്ടുണ്ടെന്നും ഉടന് നടപടിയുണ്ടാകുമെന്നും ഫേസ്ബുക്ക് പോസ്റ്റില് അദ്ദേഹം വ്യക്തമാക്കി. കണ്ണൂര് ആര്ടിഒ ഇ.എസ്. ഉണ്ണിക്കൃഷ്ണന്റെ ഫേസ്ബുക്ക് അക്കൗണ്ട് ഹാക്ക് ചെയ്ത് വ്യാജ ഫേസ്ബുക്ക് അക്കൗണ്ട് നിര്മിച്ച് പണം തട്ടാന് ശ്രമിച്ചതിനെതിരേ കഴിഞ്ഞദിവസം പോലീസില് പരാതി നല്കിയിരുന്നു. സുഹൃത്തുക്കളോട് സാമ്പത്തികസഹായം അഭ്യർഥിച്ച് സന്ദേശം അയയ്ക്കുകയാണ് ചെയ്തത്. സംശയം തോന്നിയ സുഹൃത്ത് ആര്ടിഒയെ ഫോണില് ബന്ധപ്പെട്ടപ്പോഴാണ് തട്ടിപ്പ് തിരിച്ചറിഞ്ഞത്.