കണ്ണൂർ: കോവിഡ് രൂക്ഷമായതും ഡെങ്കിപ്പനി പടരാനുള്ള സാഹചര്യവും കണക്കിലെടുത്ത് 25ന് പൊതുയിടങ്ങളിൽ യുവജനസംഘടനകളുടെയും സന്നദ്ധപ്രവർത്തകരുടെയും നേതൃത്വത്തിൽ ശുചീകരണ യജ്ഞം നടത്താൻ ഇന്നലെ ചേർന്ന ജില്ലാ പഞ്ചായത്ത് യോഗം തീരുമാനിച്ചു. ഗ്രാമപഞ്ചായത്തുകളും നഗരസഭകളും ശുചീകരണ യജ്ഞത്തിൽ പങ്കാളികളാകും.
പദ്ധതി നിർവഹണത്തിൽ മികച്ച പ്രകടനം കാഴ്ചവച്ച നിർവഹണ ഉദ്യോഗസ്ഥരെ യോഗം അനുമോദിച്ചു.സാങ്കേതിക അനുമതി ആവശ്യമായ പ്രോജക്ടുകളുടെ എസ്റ്റിമേറ്റ് ബന്ധപ്പെട്ട നിർവഹണ ഉദ്യോഗസ്ഥർ എത്രയും വേഗത്തിൽ തയാറാക്കേണ്ടതും തെരഞ്ഞെടുപ്പ് പെരുമാറ്റചട്ടം കഴിയുന്ന മുറയ്ക്ക് തന്നെ ടെൻഡർ നടപടികളിലേക്ക് കടക്കണമെന്നും ജില്ലാ പഞ്ചായത്ത് പ്രസിഡന്റ് പി.പി.ദിവ്യ അറിയിച്ചു. വിവിധ സ്റ്റാൻഡിംഗ് കമ്മിറ്റി റിപ്പോർട്ടുകൾ യോഗം അംഗീകരിച്ചു. കുടുംബശ്രീ വഴി പട്ടികവർഗ യുവതീ-യുവാക്കൾക്ക് സക്സസ് എന്ന പേരിൽ നടത്തിയ പ്രത്യേക മത്സരപരീക്ഷാ പരിശീലനത്തിന്റെ സർട്ടിഫിക്കറ്റ് വിതരണവും നടത്തി.