കണ്ണൂർ: മുന്‍ തെരഞ്ഞെടുപ്പുകളില്‍ നിന്ന് വ്യത്യസ്തമായി കൂടുതൽ പേർക്ക് കൂടി പോസ്റ്റൽ വോട്ടുകൾ അനുവദിക്കും. 80 വയസിന് മുകളിലുള്ളവര്‍, ഭിന്നശേഷിക്കാര്‍, കോവിഡ് ബാധിതരും ക്വാറൻന്‍റെനിലുള്ളവരും, മാധ്യമ പ്രവര്‍ത്തകര്‍ ഉള്‍പ്പെടെ അവശ്യ സേവന മേഖലകളില്‍ ജോലി ചെയ്യുന്നവര്‍ എന്നിവർക്കാണ് പോസ്റ്റൽ ബാലറ്റ് സംവിധാനം ഒരുക്കിയിരിക്കുന്നത്. അവശ്യ സേവന മേഖലയിലുള്ളവര്‍ ഒഴികെയുള്ളവര്‍ക്ക് പോസ്റ്റല്‍ വോട്ടിനുള്ള അപേക്ഷകള്‍ പോളിംഗ് ഉദ്യോഗസ്ഥര് വീടുകളിലെത്തിക്കും.
പോസ്റ്റല്‍ വോട്ടിനുള്ള അപേക്ഷ നല്‍കുന്നവര്‍ക്ക് അതുവഴി മാത്രമേ വോട്ട് ചെയ്യാനാവൂ. വോട്ടര്‍പട്ടികയില്‍ അവരുടെ പേരിന് നേരെ പിബി (പോസ്റ്റല്‍ ബാലറ്റ്) എന്ന് രേഖപ്പെടുത്തുന്നതിനാല്‍ അവര്‍ക്ക് ബൂത്തില്‍ ചെന്ന് വോട്ട് ചെയ്യാനാവില്ല. അവശ്യ സേവന വിഭാഗങ്ങളില്‍ ഉള്‍പ്പെടുന്നവര്‍ പോസ്റ്റല്‍ ബാലറ്റിനായി അപേക്ഷ സമര്‍പ്പിക്കണം.
നിശ്ചിത ദിവസങ്ങളില്‍ മണ്ഡലം തലത്തില്‍ ഒരുക്കുന്ന പ്രത്യേക പോസ്റ്റല്‍ വോട്ടിംഗ് സെന്‍ററില്‍ എത്തിയാണ് തപാല്‍ വോട്ട് രേഖപ്പെടുത്തേണ്ടതെന്നും ജില്ലാ കളക്ടര്‍ ടി.വി. സുഭാഷ് അറിയിച്ചു.