കണ്ണൂർ: കേന്ദ്ര, സംസ്ഥാന സർക്കാരുകൾ ഡീസലിന് സബ്സിഡി അനുവദിക്കണമെന്നും കേന്ദ്രസർക്കാരിന്‍റെ സ്ക്രാപ് പോളിസി ബസുകളുടേത് 15 വർഷത്തിൽ നിന്ന് 20 വർഷമാക്കണമെന്നും കണ്ണൂർ ജില്ലാ ബസ് ഓപ്പറേറ്റേഴ്സ് അസോസിയേഷന്‍റെ എക്സിക്യൂട്ടീവ് യോഗം ആവശ്യപ്പെട്ടു. കേന്ദ്രസർക്കാരിന്‍റെ സാന്പത്തിക പാക്കേജിൽ ബസ് വ്യവസായത്തെക്കൂടി ഉൾപ്പെടുത്തണം. ജില്ലയിലെ ഓട്ടോറിക്ഷകളുടെ സമാന്തര സർവീസ് നിർത്തണമെന്നും യോഗം ആവശ്യപ്പെട്ടു.
നാളെ കണ്ണൂർ റെയിൽവേ സ്റ്റേഷനിലേക്ക് ബസ് ഓപ്പറേറ്റേഴ്സ് അസോസിയേഷന്‍റെ നേതൃത്വത്തിൽ മാർച്ചും ധർണയും നടത്തും. നോർത്ത് മലബാർ ചേംബർ ഓഫ് കോമേഴ്സ് സെക്രട്ടറി ഹനീഷ് കെ. വാണിയംകണ്ടി ഉദ്ഘാടനംചെയ്യും. ജില്ലാ പ്രസിഡന്‍റ് പി.പി. മോഹനന്‍റെ അധ്യക്ഷതയിൽ ചേർന്ന യോഗത്തിൽ ജനറൽ സെക്രട്ടറി രാജ്കുമാർ കരുവാരത്ത്, പി. രജീന്ദ്രൻ, വി.വി. ലത്തീഫ് തുടങ്ങിയവർ പ്രസംഗിച്ചു.