കണ്ണൂർ: ശേഖരിച്ച മാലിന്യങ്ങള്‍ ജില്ലയില്‍ തന്നെ റീസൈക്ലിംഗ് ചെയ്യാന്‍ സമ്പൂര്‍ണ റീസൈക്ലിംഗ് പ്ലാന്‍റ് നിര്‍മിക്കുന്നു. ക്ലീന്‍ കേരള കമ്പനി ജില്ലാ പഞ്ചായത്തുമായി കൈകോര്‍ത്താണ് റീസൈക്ലിംഗ് യൂണിറ്റ് സ്ഥാപിക്കാനുള്ള പ്രാരംഭ നടപടി തുടങ്ങിയത്. ക്ലീന്‍ കേരള കമ്പനി മാനേജിംഗ് ഡയരക്ടര്‍ ജി.കെ. സുരേഷ് കുമാര്‍ ജില്ലാ പഞ്ചായത്ത് പ്രസിഡന്‍റ് പി.പി. ദിവ്യയുമായി കണ്ണൂരില്‍ കൂടിക്കാഴ്ച നടത്തി.
നിലവില്‍ തദ്ദേശസ്ഥാപനങ്ങളില്‍ നിന്നും വീടുകളില്‍ നിന്നും ഹരിത കര്‍മസേന ശേഖരിക്കുന്ന മാലിന്യങ്ങള്‍ ക്ലീന്‍ കേരള കമ്പനിക്ക് കൈമാറുകയും കമ്പനി വളപട്ടണത്തെ ഗോഡൗണില്‍ സൂക്ഷിക്കുകയുമാണ് ചെയ്യുന്നത്.
രണ്ടേക്കര്‍ സ്ഥലത്ത് പ്ലാന്‍റ് നിര്‍മിക്കാനാണ് ആലോചന. ഇതിന് ആവശ്യമായ സ്ഥലം തദ്ദേശസ്ഥാപനങ്ങളുടെ സഹകരണത്തോടെ കണ്ടെത്തും. റീസൈക്ലിംഗ് പ്ലാന്‍റ് യാഥാര്‍ഥ്യാമായാല്‍ ഹരിതകര്‍മസേനക്ക് കൂടുതല്‍ തുക നല്‍കാന്‍ ക്ലീന്‍ കേരളക്ക് കഴിയും.
നിലവില്‍ ജില്ലയിലെ 66 പഞ്ചായത്തുകളും രണ്ടു നഗരസഭകളും ക്ലീന്‍ കേരളക്കാണ് മാലിന്യം കൈമാറുന്നത്.