മട്ടന്നൂർ: കണ്ണൂർ വിമാനത്താവളത്തിനായി ഭൂമി വിട്ടുനൽകിയവരുടെ ഒന്പത് വര്‍ഷത്തെ കാത്തിരിപ്പിന് വിരാമമാകുന്നു. നഷ്ടപരിഹാരമായി 200 കോടി രൂപ അനുവദിച്ചുകൊണ്ട് സര്‍ക്കാര്‍ ഉത്തരവായി.
വിമാനത്താവളത്തിന്‍റെ റണ്‍വേ വികസനവുമായി ബന്ധപ്പെട്ട് കൊതേരി മേഖലയില്‍ 19.73 ഹെക്‌ടര്‍ ഭൂമി ഏറ്റെടുക്കുന്നതിന് നടപടികള്‍ ആരംഭിച്ചിട്ട് വര്‍ഷങ്ങളായി. നടപടികള്‍ പൂര്‍ത്തിയായെങ്കിലും ഭൂവുടമകള്‍ക്ക് നഷ്ടപരിഹാരം നല്‍കുന്നത് വിവിധ കാരണങ്ങളാല്‍ നീണ്ടുപോകുകയായിരുന്നു.
വര്‍ഷങ്ങളായി ഭൂമിയുടെ രേഖകള്‍ സര്‍ക്കാരില്‍ സമര്‍പ്പിച്ച ഭൂവുടമകള്‍ ഭൂമിയില്‍ പ്രവേശിക്കാനോ വീടുകളുടെ അറ്റകുറ്റപ്പണികള്‍ നടത്താനോ സാധിക്കാതെ വലിയ ദുരിതത്തിലായിരുന്നു. പ്രശ്നം പരിഹരിക്കണമെന്നാവശ്യപ്പെട്ട് നാട്ടുകാർ നിരവധി തവണ സര്‍ക്കാരിന് നിവേദനം നൽകിയിരുന്നു.
സമ്മർദം ശക്തമായതോടെ സര്‍ക്കാര്‍ വിളിച്ചുചേര്‍ത്ത യോഗത്തില്‍ കിന്‍ഫ്ര വായ്പ ലഭ്യമാക്കി ഭൂമി ഏറ്റെടുക്കണമെന്ന് തീരുമാനമുണ്ടായി.
എന്നാല്‍ ഇത്രയും വലിയ തുക വായ്പയായി ലഭ്യമാക്കാന്‍ കാലതാമസം നേരിട്ടതോടെ സ്ഥലമെടുപ്പ് നടപടികള്‍ വീണ്ടും നീണ്ടുപോയി. ഇതോടെ പ്രതിഫലം നല്‍കി ജനങ്ങളെ മാറ്റിപ്പാര്‍പ്പിക്കുന്നത് സാധിക്കാതെ വന്നു. രണ്ടാം പിണറായി സര്‍ക്കാര്‍ അധികാരത്തില്‍ വന്നയുടന്‍ വിഷയം സ്ഥലം എംഎല്‍എ കെ.കെ. ശൈലജ സര്‍ക്കാരിന്‍റെ ശ്രദ്ധയില്‍പ്പെടുത്തുകയും ഇതിനെത്തുടര്‍ന്ന് സ്ഥലം ഏറ്റെടുക്കുന്നതിന് മുഖ്യമന്ത്രി ഇന്നലെ നിര്‍ദേശം നല്‍കുകയും ചെയ്തു.
തുടര്‍ന്നാണ് ഭൂമി ഏറ്റെടുക്കുന്നതിനുള്ള തുക ധനവകുപ്പ് പ്രത്യേകമായി അനുവദിച്ചുനല്‍കിയത്. ഇതോടെ ഒമ്പത് വര്‍ഷത്തോളമായി പ്രദേശത്തെ 90 ഓളം കുടുംബങ്ങള്‍ നേരിട്ടുകൊണ്ടിരുന്ന ദുരിതത്തിനാണ് പരിഹാരമാകുന്നത്.
കണ്ണൂർ വിമാനത്താവള ഭൂമിയേറ്റെടുക്കൽ; 200 കോടി രൂപ അനുവദിച്ചു
