കൊട്ടിയൂർ: ഓൺലൈൻ പഠനസൗകര്യമില്ലാത്ത വിദ്യാർഥിനിക്ക് പഠനത്തിനായി ജില്ലാ പഞ്ചായത്തംഗത്തിന്റെ കൈത്താങ്ങ്. ജില്ലാ പഞ്ചായത്തംഗം ജൂബിലി ചാക്കോയാണ് ചുങ്കക്കുന്ന് ഒറ്റപ്ലാവ് സ്വദേശിയായ വിദ്യാർഥിനിക്ക് പഠനാവശ്യത്തിനായി മൊബൈൽ ഫോൺ നൽകിയത്. വിദ്യാർഥിനിയുടെ പിതാവ് അപകടത്തിൽപ്പെട്ട് വർഷങ്ങളായി കിടപ്പിലാണ്. ഓൺലൈൻ പഠന സൗകര്യമില്ലാത്തതിന്റെ വിഷമം വിദ്യാർഥിനി ജൂബിലി ചാക്കോയോട് പറഞ്ഞിരുന്നു. ഇതിനു തൊട്ടുപിന്നാലെയാണ് മൊബൈൽ ഫോൺ എത്തിച്ചു നൽകിയത്. ഇത്തരത്തിൽ നിരവധി വിദ്യാർഥികൾ ഫോൺ സൗകര്യവും മൊബൈൽ സിഗ്നലും ഇല്ലാതെ ബുദ്ധിമുട്ടുന്നുണ്ടെന്നും ഇത് പരിഹരിക്കാൻ സർക്കാരിന്റെ ഭാഗത്തുനിന്ന് നടപടികൾ വേണമെന്നും ജൂബിലി ചാക്കോ ആവശ്യപ്പെട്ടു. ഫോൺ കൈമാറുന്ന ചടങ്ങിൽ പഞ്ചായത്തംഗം മിനി പൊട്ടങ്കൽ, കോൺഗ്രസ് ബൂത്ത് പ്രസിഡന്റുമാരായ ബിജു മുക്കടക്കാട്ട്, ബി.പി.ജയ്സൺ എന്നിവരും പങ്കെടുത്തു.