ഡല്‍ഹിയില്‍ നടക്കുന്ന കര്‍ഷകപ്രക്ഷോഭത്തിന് ആറുമാസം തികയുന്ന 26ന് കേരളത്തിൽ കർഷക പ്രതിഷേധദിനമായി ആചരിക്കാൻ സ്വതന്ത്ര കർഷകസംഘടനകളുടെ കൂട്ടായ്മയായ രാഷ്‌ട്രീയ കിസാൻ മഹാസംഘും ദില്ലി ചലോ കർഷകസമര ഐക്യദാർഢ്യ സമിതിയും തീരുമാനിച്ചു. അന്നു രാവിലെ പത്തിന് പതിനായിരം കേന്ദ്രങ്ങളിൽ വീട്ടുമുറ്റ പ്രതിഷേധം നടത്തും.
വൈകുന്നേരം ആറിന് കുടുംബാംഗങ്ങളും സുഹൃത്തുക്കളും പ്രതിഷേധ പന്തം (മെഴുകുതിരി) കൊളുത്തി ദിനാചരണം അവസാനിപ്പിക്കും.
ഇതിനു മുന്നോടിയായി നാളെ രാത്രി എട്ടിന് ഓൺലൈൻ ഐക്യദാർഢ്യ സമ്മേളനം നടത്തും. ഡൽഹിയിലെ കർഷകസമരത്തിന്‍റെ നേതാക്കളിലൊരാളായ ഡോ. യോഗേന്ദ്രയാദവ് ഐക്യദാർഢ്യ സമ്മേളനം ഉദ്ഘാടനം ചെയ്യുമെന്ന് രാഷ്‌ട്രീയ കിസാൻ മഹാസംഘ്- ദില്ലി ചലോ കർഷകസമര ഐക്യദാർഢ്യ സമിതി നേതാക്കളായ കെ.വി. ബിജു, അഡ്വ.ബിനോയ് തോമസ്, പി.ടി. ജോൺ, എൻ. സുബ്രഹ്മണ്യൻ എന്നിവർ അറിയിച്ചു.