കേളകം: ജനമൈത്രി പോലീസിന്റെ നേതൃത്വത്തിൽ കേളകം പോലീസ് സ്റ്റേഷൻ പരിധിയിൽ വരുന്ന എസ്.സി, എസ്.ടി കോളനി നിവാസികൾക്കായി ജില്ലാ പോലീസ് മേധാവിയുടെ പരാതി പരിഹാര അദാലത്ത് സംഘടിപ്പിച്ചു. കണ്ടപ്പുനം ഫോറസ്റ്റ് ഓഫീസ് ഹാളിൽ വെച്ച് നടന്ന അദാലത്ത് പേരാവൂർ ഡി.വൈ.എസ്.പി എ വി ജോൺ ഉദ്ഘാടനം ചെയ്തു. കൊട്ടിയൂർ ഗ്രാമ പഞ്ചായത്ത് പ്രസിഡന്റ് റോയ് നമ്പുടാകം പരിപാടിക്ക് അദ്ധ്യക്ഷത വഹിച്ചു. കേളകം എസ്.എച്ച്.ഒ എസ് അജയകുമാർ, എ.എസ്.ഐ എ സജേഷ്, കൊട്ടിയൂർ ഗ്രാമ പഞ്ചായത്ത് വൈസ് പ്രസിഡന്റ് ഫിലോമിന തുമ്പൻതുരുത്തിയിൽ, എസ്.ടി പ്രമോട്ടർ ആര്യ ജയൻ, കുഞ്ഞിക്കണ്ണൻ തുടങ്ങിയവർ സംസാരിച്ചു.
പഞ്ചായത്ത് സെക്രട്ടറിമാർ, എസ്.സി, എസ്.ടി പ്രമോട്ടർമാർ, താലൂക്ക്, ആരോഗ്യം, എക്സൈസ്, വി ഇ ഒ, കെ എസ് ഇ ബി, സ്കൂളുകൾ, പി ഡബ്ല്യു ഡി തുടങ്ങി വിവിധ വകുപ്പുകളുടെ സഹകരണത്തോടെ പരാതികൾ ഉടനടി പരിഹരിക്കുവാനായാണ് അദാലത്ത് സംഘടിപ്പിച്ചത്. വിവിധ കോളനികളിൽ നിന്നായി നൂറോളം എസ്.സി, എസ്.ടി വിഭാഗക്കാർ അദാലത്തിൽ പങ്കെടുത്തു.