പൂനെ: ന്യൂസിലന്‍ഡിനെതിരായ രണ്ടാം ക്രക്കറ്റ് ടെസ്റ്റില്‍ ബാറ്റിംഗില്‍ പൂജ്യത്തിന് പുറത്തായ രോഹിത്തിന്‍റെ ക്യാപ്റ്റന്‍സിക്കെതിരെയും വിമര്‍ശനങ്ങള്‍ ഉയരുമ്പോള്‍ ഫീല്‍ഡറെന്ന നിലയിലും നിരാശപ്പെടുത്തി ഇന്ത്യൻ ക്യാപ്റ്റൻ.സ്പിന്നര്‍മാര്‍ പന്തെറിയുമ്പോള്‍ സ്ലിപ്പില്‍ ഫീല്‍ഡ് ചെയ്യാറുള്ള രോഹിത് ന്യൂസിലന്‍ഡിന്‍റെ രണ്ടാം ഇന്നിംഗ്സില്‍ ഇതുവരെ മൂന്ന് ക്യാച്ചുകളാണ് നഷ്ടപ്പെടുത്തിയത്.
രണ്ടാം ദിനം രവീന്ദ്ര ജഡേജയുടെ പന്തില്‍ ടോം ലാഥമിന്‍റെ ക്യാച്ച് നഷ്ടപ്പെടുത്തിയ രോഹിത് മൂന്നാം ദിനം രാവിലെ ആര്‍ അശ്വിന്‍റെ പന്തില്‍ ഗ്ലെന്‍ ഫിലിപ്സിന്‍റെ ക്യാച്ചും നഷ്ടപ്പെടുത്തിയിരുന്നു. ടോം ലാഥമിന്‍റെ ക്യാച്ച് എടുക്കുക കുറച്ചു ബുദ്ധിമുട്ടായിരുന്നെങ്കിലും ഗ്ലെന്‍ ഫിലിപ്സിന്‍റേത് അനായാസം കൈയിലൊതുക്കാവുന്ന ക്യാച്ചായിരുന്നു. ടോം ലാഥം 68 റണ്‍സില്‍ നില്‍ക്കുമ്പോഴും ഫിലിപ്സ് 10 റണ്‍സില്‍ നില്‍ക്കുമ്പോഴുമാണ് രോഹിത് ക്യാച്ച് പാഴാക്കിയത്. ലാഥം 89 റണ്‍സടിച്ചപ്പോള്‍ ഫിലിപ്സ് 31റണ്‍സുമായി ഇന്ത്യക്ക് ഭീഷണിയായി ഇപ്പോഴും ക്രീസിലുണ്ട്.