മുണ്ടക്കൈ ഉരുൾപൊട്ടലിൽ മരണസംഖ്യ ഉയരുന്നു. വിവിധ ഭാഗങ്ങളിൽനിന്നായി 19 മൃതദേഹങ്ങൾ കണ്ടെത്തി.

കൽപറ്റ: മുണ്ടക്കൈ ഉരുൾപൊട്ടലിൽ മരണസംഖ്യ ഉയരുന്നു. വിവിധ ഭാഗങ്ങളിൽനിന്നായി 19 മൃതദേഹങ്ങൾ കണ്ടെത്തി. മരിച്ചവരിൽ കുട്ടികളുമുണ്ട്. മുണ്ടക്കൈ, അട്ടമല പ്രദേശങ്ങൾക്കു പുറമെ മലപ്പുറം ജില്ലയിൽ ചാലിയാർ പുഴയിൽനിന്നും മൃതദേഹങ്ങൾ കണ്ടെത്തിയിട്ടുണ്ട്. നിരവധി പേർ മണ്ണിനടിയിലാണ്.

ഉരുൾപൊട്ടലിൽ 40 പേർ മേപ്പാടിയിലെ വിംസ് ആശുപത്രിയിൽ ചികിത്സ തേടിയിട്ടുണ്ട്. നാല് മൃതദേഹങ്ങളും ആശുപത്രിയിലുണ്ട്. വയനാട്ടിലെ ഹാരിസൺസ് എസ്റ്റേറ്റിൽ എട്ട് തൊഴിലാളികളെ കാണാതായതായും റിപ്പോർട്ടുണ്ട്. എസ്റ്റേറ്റിലേക്കുള്ള ഏക പാലം ഒലിച്ചുപോയി. 400 കുടുംബങ്ങൾ എസ്റ്റേറ്റിലുണ്ടെന്നാണു വിവരം.