ഓടയിൽ വീണ് കുരുങ്ങിക്കിടന്ന പശുവിനെ രക്ഷപ്പെടുത്തി

ഇരിട്ടി: റോഡരികിലെ ഇടുങ്ങിയ ഓടയിൽ വീണ് പുറത്തു കയറാനാവാതെ കുരുങ്ങിക്കിടന്ന പശുവിനെ മണിക്കൂറുകളുടെ ശ്രമത്തിനൊടുവിൽ പുറത്തെത്തിച്ചു രക്ഷപ്പെടുത്തി. കീഴ്പ്പള്ളി – വിയറ്റ്നാം റോഡിൽ അമ്പലക്കുന്നിലെ ഓടയിലാണ് പശു അബദ്ധത്തിൽ വീണത്. ഇടുങ്ങിയ ഓടയിൽ കുരുങ്ങി രക്ഷപ്പെടാനാവാതെ കിടന്ന പശുവിനെ കീഴ്പ്പള്ളി സെക്ഷൻ ഫോറസ്റ്റ് സ്റ്റാഫും ഇരിട്ടി അഗ്നിശമന സേനയും നാട്ടുകാരും ചേർന്നാണ് ഏറെ നേരത്തെ ശ്രമത്തിനൊടുവിൽ പുറത്തെത്തിച്ചത്. എടൂർ വെറ്റനറി സർജൻ സ്ഥലത്തെത്തി ആവശ്യമായ ചികിത്സയും നൽകി.