കണ്ണൂർ: കണിച്ചാർ, കോളയാട് പഞ്ചായത്തുകളിലുണ്ടായ ഉരുൾപൊട്ടലിൽ ജീവഹാനി സംഭവിച്ചവരുടെ ബന്ധുക്കൾക്കും നാശനഷ്‌ടമുണ്ടായവർക്കും പ്രത്യേക പാക്കേജ് പ്രഖ്യാപിക്കണമെന്ന് സിപിഎം ജില്ലാ സെക്രട്ടറി എം.വി. ജയരാജൻ. കഴിഞ്ഞ ഓഗസ്റ്റിൽ കോളയാട്, കണിച്ചാർ പഞ്ചായത്തുകളിലുണ്ടായ ഉരുൾപൊട്ടലിൽ മതിയായ നഷ്‌ടപരിഹാരം ആവശ്യപ്പെട്ട് എൽഡിഎഫ് കണിച്ചാർ പഞ്ചായത്ത് കമ്മിറ്റി ന‌ടത്തിയ കളക്‌ടറേറ്റ് മാർച്ച് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
കണിച്ചാർ ഗ്രാമപഞ്ചായത്ത് പ്രസിഡന്‍റ് ആന്‍റണി സെബാസ്റ്റ്യൻ അധ്യക്ഷത വഹിച്ചു. കേരള കോൺഗ്രസ്-എം ജില്ലാ പ്രസിഡന്‍റ് ജോയി കൊന്നക്കൽ, സിപിഐ ജില്ലാ അസിസ്റ്റന്‍റ് സെക്രട്ടറി എ. പ്രദീപൻ, കണിച്ചാർ ഗ്രാമപഞ്ചായത്ത് വൈസ് പ്രസിഡന്‍റ് ഷാന്‍റി തോമസ്, വികസന സ്റ്റാൻഡിംഗ് കമ്മിറ്റി ചെയർമാൻ തോമസ് വടശേരി, പഞ്ചായത്തംഗങ്ങളായ ജിമ്മി ഏബ്രഹാം, സോജിത്ത് ചന്ദ്രൻകുന്നേൽ ഉൾപ്പെടെയുള്ളവർ പങ്കെടുത്തു. ഓഗസ്റ്റ് ഒന്നിനാണ് നെടുംപുറംചാൽ, പൂളക്കുറ്റി, കോളയാട് പഞ്ചായത്തിലെ ചെക്കേരി മേഖലകളിലുണ്ടായ ഉരുൾപൊട്ടലിൽ മൂന്നാളുകൾക്ക് ജീവൻ നഷ്‌ടമായത്.
ഉരുൾപൊട്ടൽ ദുരന്തത്തിനിരയായവർക്ക് പാക്കേജ് അനുവദിക്കണം: എം.വി. ജയരാജൻ
