കണ്ണൂർ: ദേശീയ ജന്തുരോഗ നിയന്ത്രണ പദ്ധതിയുടെ ഭാഗമായുള്ള കുളമ്പുരോഗ പ്രതിരോധ കുത്തിവയ്പ് മൂന്നാം ഘട്ടം കണ്ണൂർ ജില്ലാതല ഉദ്ഘാടനം ഇന്ന് നടക്കും. ജില്ലാ വെറ്ററിനറി കേന്ദ്രത്തിൽ രാവിലെ പത്തിന് മേയർ ടി.ഒ. മോഹനൻ ഉദ്ഘാടനം നിർവഹിക്കുമെന്ന് ജില്ലാ മൃഗ സംരക്ഷണ ഓഫീസർ ഡോ. എസ്.ജെ. ലേഖ അറിയിച്ചു. ഡിസംബർ എട്ടുവരെയുള്ള 21 പ്രവൃത്തി ദിവസങ്ങളിൽ വാക്സിനേറ്റർമാർ വീടുകളിൽ എത്തി കുത്തിവയ്പ് നടത്തും.
നാലു മാസത്തിന് മുകളിൽ പ്രായമുള്ള മൃഗങ്ങൾക്ക് കത്തിവയ്പ് നൽകണം. ജില്ലയിലെ 91,706 പശുക്കളെയും 2449 എരുമ /പോത്തുകളെയും കുത്തിവയ്പിന് വിധേയമാക്കുമെന്ന് ഡോ. ലേഖ അറിയിച്ചു. കുത്തിവയ്പിന് കർഷകരിൽനിന്ന് ഫീസ് ഈടാക്കുന്നില്ല.
കുത്തിവച്ചാൽ പനി, പാൽ കുറയുക തുടങ്ങിയ പാർശ്വഫലങ്ങൾ ഇല്ല. കുളമ്പുരോഗ പ്രതിരോധ കുത്തിവയ്പ് സംസ്ഥാനത്ത് നിയമപ്രകാരം നിർബന്ധമാക്കിയിട്ടുണ്ടെന്നും ഡോ. എസ്. ജെ ലേഖ പറഞ്ഞു.പത്രസമ്മേളനത്തിൽ ഡോ. ടി.വി.ജയമോഹനൻ, ഡോ. നസീമ എന്നിവരും പങ്കെടുത്തു.
കുളമ്പുരോഗ പ്രതിരോധ കുത്തിവയ്പ് ജില്ലാതല ഉദ്ഘാടനം ഇന്ന്
