പ്രമേഹബാധിത വിദ്യാര്‍ഥികള്‍ക്ക് ഉന്നതവിദ്യാഭ്യാസവകുപ്പിന്‍റെ മധുരവാര്‍ത്ത. ടൈപ്പ് വണ്‍ വിഭാഗത്തില്‍പ്പെട്ട പ്രമേഹബാധിതരായ വിദ്യാര്‍ഥികള്‍ക്കാണ് വിദ്യാഭ്യാസവകുപ്പിന്‍റെ ഉത്തരവ് ആശ്വാസമായിരിക്കുന്നത്. ടൈപ്പ് വണ്‍ പ്രമേഹബാധിതരായ വിദ്യാര്‍ഥികള്‍ക്ക് പരീക്ഷാസമയത്ത് ഇന്‍സുലിന്‍ പമ്പ്, ഇന്‍സുലില്‍ പെന്‍, ഷുഗര്‍ ടാബ് ലെറ്റ്, ചോക്ലേറ്റ്, പഴങ്ങള്‍, സ്‌നാക്‌സ് , വെള്ളം തുടങ്ങിയവ കൈവശം സൂക്ഷിച്ച് ഉപയോഗിക്കുന്നതിനാണ് അനുമതി നല്‍കിയിട്ടുള്ളത്.
ടൈപ്പ് വണ്‍ ഡയബറ്റിക്‌സ് ഫൗണ്ടേഷന്‍ സംസ്ഥന പ്രസിഡന്‍റ് നല്‍കിയ നിവേദനത്തിന്‍റെ അടിസ്ഥാനത്തിലാണ് ഉന്നതവിദ്യാഭ്യാസവകുപ്പിന്‍റെ ഉത്തരവ്. ഈ മാസം അഞ്ചിനാണ് 1470-ാം നമ്പറായി ഉന്നതവിദ്യാഭ്യാസവകുപ്പ് ഉത്തരവിറക്കിയത്.
സംസ്ഥാനത്തെ ഉന്നതവിദ്യാഭ്യാസവകുപ്പിന്‍റെ കീഴില്‍ വരുന്ന പ്രഫഷണല്‍ കോളജുകള്‍ ഉള്‍പ്പെടെയുള്ള എല്ലാ വിദ്യാഭ്യാസസ്ഥാപനങ്ങളിലേയും വിദ്യാര്‍ഥികള്‍ക്ക് ഈ ഉത്തരവ് ബാധകമാണെന്ന് പരാമര്‍ശിച്ചിട്ടുണ്ട്.
സര്‍ട്ടിഫിക്കറ്റിന്‍റേയും മെഡിക്കല്‍ രേഖയുടേയും അടിസ്ഥാനത്തിലാണ് അനുമതി നല്‍കുന്നത്. കൈവശമെത്തിക്കുന്ന വസ്തുക്കള്‍ ഇന്‍വിജിലേറ്റര്‍ പരിശോധിച്ചതിന് ശേഷമാണ് പ്രവേശിക്കാനുളള അനുമതി നല്‍കേണ്ടെതെന്നും ഉത്തരവില്‍ വ്യക്തമാക്കിയിട്ടുണ്ട്.
ഈ അനുകൂല്യം ടൈപ്പ് വണ്‍ പ്രമേഹ രോഗികളായ വിദ്യാര്‍ഥികള്‍ക്ക് ലഭിക്കുന്നുണ്ടെന്ന് സ്ഥാപനമേലധികാരികള്‍ ഉറപ്പ് വരുത്തണമെന്നും ഉത്തരവില്‍ വ്യക്തമാക്കിയിട്ടുണ്ട്.