ഇരിട്ടി: ആദിവാസിയെ കാട്ടാന ചവിട്ടിക്കൊന്നതിനെത്തുടർന്നുണ്ടായ ജനരോഷം തണുപ്പിക്കാനായി ആറളം ഫാമിൽ വീണ്ടും ആനതുരത്തൽ. ഫാമിലും പുനരധിവാസ മേഖലയിലും തമ്പടിച്ചിട്ടുള്ള കാട്ടാനകളെ തുരത്തുന്നതിനുള്ള ശ്രമമാണ് തുടങ്ങിയത്.
ഇന്നലെ രാവിലെ ഏഴോടെ ആറളം ഫാം മേഖലയിൽ കൊട്ടിയൂർ റേഞ്ചർ സുധീർ നാരോത്തിന്‍റെ നേതൃത്വത്തിൽ ആറളം വന്യജീവി സങ്കേതം വനപാലകരുടെയും ആർആർടിയുടെയും നേതൃത്വത്തിലുള്ള 60 അംഗ സംഘമാണ് ആനകളെ വനത്തിലേക്ക് കടത്തിവിടാനുള്ള നടപടി ആരംഭിച്ചത്. ബ്ലോക്ക് ഏഴ്, പത്ത് എന്നിവിടങ്ങളിൽ ഉൾപ്പെടെയാണ് തെരച്ചിൽ നടത്തിയത്. കനത്ത മഴയും വനതുല്യമായ കാടും തുരത്തലിന് തടസം സൃഷ്ടിച്ചു. പല ഘട്ടങ്ങളിലും മഴയും കാടുമായതിനാൽ അടുത്തെത്തുമ്പോൾ മാത്രമാണ് ആനയെ കാണുന്നത്. ഇത് വനപാലകരുടെ ജീവനുതന്നെ ഭീഷണിയായി.
കഴിഞ്ഞദിവസം പി.എ. ദാമുവിനെ ഏഴാം ബ്ലോക്കിൽ വച്ച് കാട്ടാന കൊലപ്പെടുത്തിയതിനെ തുടർന്ന് ജില്ലാ കളക്‌ടറുടെ നേതൃത്വത്തിൽ നടന്ന യോഗ തീരുമാനമനുസരിച്ചാണ് ആനകളെ തുരത്തുന്നത്. ഒന്നാം ഘട്ടമായി ആനകൾ ഉള്ള സ്ഥലം നിരീക്ഷിച്ച് ഇവയെ വനത്തിലേക്ക് തുരത്തി തിരിച്ചിറങ്ങാതെ കാവൽ ഏർപ്പെടുത്തുകയാണ് ചെയ്യുക. മഴയുടെ രൂക്ഷത കുറയുമ്പോൾ കൂടുതൽ വനംവകുപ്പ് ജീവനക്കാരെ വരുത്തി കോട്ടപ്പാറ വഴി കാട്ടിലേക്ക് തുരത്താനാണ് ശ്രമിക്കുന്നത്.
ജനങ്ങൾ ആന തുരത്തൽ നടത്തുന്ന സമയങ്ങളിൽ വീട്ടിൽനിന്നു പുറത്തിറങ്ങാതെയും വാഹനങ്ങൾ കടന്നുപോകാതെയും പരമാവധി സഹകരിക്കണമെന്ന് വനവകുപ്പ് അഭ്യർഥിച്ചിട്ടുണ്ട്. കൊട്ടിയൂർ റേഞ്ചർ സുധീർ നാരോത്തിന് പുറമേ ആർആർടി ഡപ്യൂട്ടി റേഞ്ചർ ശശികുമാർ ചെങ്ങൽ വീട്ടിൽ, ഇരിട്ടി ഫോറസ്റ്റർ കെ. ജിജിൽ, മണത്തണ ഫോറസ്റ്റർ സി.കെ. മഹേഷ്, ആർആർടി ഫോറസ്റ്റർ എം. രാജൻ, കീഴ്പള്ളി ഫോറസ്റ്റർ പി. പ്രകാശൻ, തോലമ്പ്ര ഫോറസ്റ്റർ അനീഷ് എന്നിവരുടെ നേതൃത്വത്തിലാണ് ആദ്യദിവസം ആനകളെ തുരത്തിയത്.