ഇരിട്ടി: പേരാവൂര് നിയോജകമണ്ഡലത്തില് 400 കെവി വൈദ്യുത ലൈന് കടന്നുപോകുന്ന പ്രദേശങ്ങളിലെ കൃഷിഭൂമിയേയും, കിടപ്പാടത്തേയും സാരമായി ബാധിക്കുന്ന ജനങ്ങള്ക്ക് അര്ഹമായ നഷ്ട പരിഹാരം നല്കണമെന്ന് ആവശ്യപ്പെട്ട് സണ്ണി ജോസഫ് എംഎല്എയുടെ നേതൃത്വത്തില് വൈദ്യുതി വകുപ്പ് മന്ത്രിക്ക് നിവേദനം നല്കി.കേളകം, കണിച്ചാർ, ആറളം, അയ്യന്കുന്ന്, പായം പഞ്ചായത്തുകളിലൂടെ 30 കിലോമീറ്റർ അധികം ദൂരത്തിൽ ലൈൻ കടന്നു പോകുന്പോൾ സ്ഥലവും, കൃഷിയും, കിടപ്പാടവും ഉൾപ്പെടെ സാരമായി ബാധിക്കുന്ന പ്രദേശവാസികൾക്ക് ടവര് സ്ഥാപിക്കുന്ന സ്ഥലത്തിന്റെ നിലവിലുള്ള മാർക്കറ്റ് വിലയുടെ രണ്ടിരട്ടി തുക നഷ്ടപരിഹാരമായി നൽകുക, ലൈൻ കടന്നുപോകുന്ന സ്ഥലത്തിന് നിലവിലുള്ള മാർക്കറ്റ് വില ലഭ്യമാക്കുക, തുടങ്ങിയ കാര്യങ്ങള് ഉന്നയിച്ച് നഷ്ടപരിഹാരം ലഭ്യമാക്കുന്നതിനുള്ള നടപടികൾ സ്വീകരിക്കണമെന്നാണ് ആവശ്യം. സണ്ണി ജോസഫ് എംഎല്എയുടെ നേതൃത്വത്തില് ജില്ലാ പഞ്ചായത്ത് വൈസ് പ്രസിഡന്റ് ബിനോയ് കുര്യൻ, അയ്യൻകുന്ന് പഞ്ചായത്ത് പ്രസിഡന്റ് കുര്യാച്ചൻ പൈമ്പളിക്കുന്നേൽ, ആറളം പഞ്ചായത്ത് പ്രസിഡന്റ് രാജേഷ്, കണിച്ചാർ പഞ്ചായത്ത് പ്രസിഡന്റ് ആന്റണീ സെബാസ്റ്റ്യൻ, കർഷക പ്രതിനിധി ബെന്നി പുതിയാപുറം തുടങ്ങിയവര് മന്ത്രിയെ നേരില് കണ്ട് നിവേദനം നല്കി.
അനുഭാവപൂര്വം പരിഗണിക്കാമെന്നും കളക്ടര്, എംഎംഎല് മാര് ഉള്പ്പെടെയുള്ളവരുടെ ഔദ്യോഗിക യോഗം ചേരുന്നതാണെന്നും വൈദ്യതി മന്ത്രി അറിയിച്ചതായി സണ്ണി ജോസഫ് എംഎല്എ പറഞ്ഞു.
previous post