പോലീസുകാരുടെ കൈക്കരുത്തിൽ ചന്പക്കുളം ചുണ്ടന് രാജപ്രമുഖൻ ട്രോഫി. രണ്ടു വർഷത്തെ ഇടവേളയ്ക്കുശേഷം ഇന്നലെ നടന്ന ചന്പക്കുളം മൂലംവള്ളംകളിയുടെ ആവേശകരമായ ഫൈനലിൽ കേരള പോലീസ് ബോട്ട് ക്ലബ് തുഴഞ്ഞ ചന്പക്കുളം ചുണ്ടൻ ഒന്നാമതെത്തി.
ചന്പക്കുളം എം.സി. കുഞ്ഞപ്പനായിരുന്നു ക്യാപ്റ്റൻ. ബിജോമോൻ ജോസഫിന്റെ നേതൃത്വത്തിൽ നടുഭാഗം ബോട്ട് ക്ലബ് തുഴഞ്ഞ നടുഭാഗം ചുണ്ടനാണ് രണ്ടാം സ്ഥാനം.
കാരിച്ചാൽ ബോട്ട് ക്ലബിന്റെ ജോർജ് ബൈജു ക്യാപ്റ്റനായ കാരിച്ചാൽ ചുണ്ടൻ മൂന്നാം സ്ഥാനം നേടി. ഹീറ്റ്സ് മത്സരങ്ങളിൽ രണ്ടാം സ്ഥാനത്തേക്കു പിൻതള്ളപ്പെട്ട ചുണ്ടൻവള്ളങ്ങളുടെ ലൂസേഴ്സ് ഫൈനലിൽ വാരിയേഴ്സ് ബോട്ട് ക്ലബ്ബിന്റെ വീയപുരം ചുണ്ടൻ ഒന്നാമതായും പായിപ്പാട് ബോട്ട് ക്ലബ്ബിന്റെ ആയാപറന്പ് പാണ്ടി രണ്ടാമതായും ഫിനിഷ് ചെയ്തു.
ചുണ്ടൻ വള്ളങ്ങളുടെ സെക്കൻഡ് ലൂസേഴ്സ് ഫൈനലിൽ യുബിസി കൈനകരി തുഴഞ്ഞ ജവഹർ തായങ്കരി ആദ്യം ഫിനിഷിംഗ് പോയിന്റ് കടന്നു. കൊടിക്കുന്നിൽ സുരേഷ് എംപി ജലമേള ഉദ്ഘാടനം ചെയ്തു.