മനുഷ്യനു വരയ്ക്കാന്‍ സാധിക്കാത്ത നിറങ്ങള്‍പോലും പകര്‍ത്താന്‍ കഴിയുന്ന കലയാണ് ഫോട്ടോഗ്രഫിയെന്നും കൊച്ചുകുട്ടികള്‍ക്കു പോലും ഒപ്പിയെടുക്കാവുന്നതാണ് അതെന്നും ശില്പി കാനായി കുഞ്ഞിരാമന്‍. കേരള ലളിതകലാ അക്കാദമിയുടെ 2019, 2020 വര്‍ഷങ്ങളിലെ സംസ്ഥാന ഫോട്ടോഗ്രഫി പുരസ്‌കാര വിതരണ ചടങ്ങ് ഓണ്‍ലൈനിലൂടെ ഉദ്ഘാടനം ചെയ്യുകയായിരുന്നു അദ്ദേഹം.
2019, 2020 വര്‍ഷങ്ങളിലെ മുഖ്യപുരസ്‌കാരങ്ങള്‍ നേടിയ മുഹമ്മദ് സാഫി, കെ.സി. നിജീഷ് എന്നിവരും ഓണറബിള്‍ മെന്‍ഷന്‍സ് നേടിയ അനൂപ് കൃഷ്ണ, ലിഷോയ് നാരായണന്‍, ഷാജി എന്‍. ജലീല്‍, അഖില്‍ വിഷ്ണു എന്നിവരും സ്‌പെഷല്‍ ജൂറി മെന്‍ഷന്‍ സര്‍ട്ടിഫിക്കറ്റുകള്‍ നേടിയ നാസര്‍ എടപ്പാള്‍, സുനില്‍ വിജയന്‍ എന്നിവരും അവാര്‍ഡുകള്‍ ഏറ്റുവാങ്ങി.
അക്കാദമി ചെയര്‍പേഴ്‌സണ്‍ മുരളി ചീരോത്ത് അധ്യക്ഷത വഹിച്ച ചടങ്ങില്‍ ചലച്ചിത്രകാരന്‍ രഞ്ജി പണിക്കര്‍ മുഖ്യാതിഥിയായി. കെപിസിഎല്‍ സ്‌പെഷല്‍ ഓഫീസര്‍ പ്രസാദ് ബാലകൃഷ്ണന്‍ നായര്‍ മുഖ്യപ്രഭാഷണം നടത്തി.
ഫോട്ടോ ജേര്‍ണലിസ്റ്റ് രാജന്‍ പൊതുവാള്‍, ആര്‍ട്ടിസ്റ്റും ഫോട്ടോഗ്രാഫറുമായ വിവേക് വിലാസിനി എന്നിവര്‍ ആശംസകളര്‍പ്പിച്ചു. അക്കാദമി സെക്രട്ടറി എന്‍. ബാലമുരളീകൃഷ്ണന്‍ സ്വാഗതവും നിര്‍വാഹക സമിതി അംഗം സിജി ആര്‍. കൃഷ്ണന്‍ നന്ദിയും രേഖപ്പെടുത്തി.