ഗൾഫ് രാജ്യങ്ങളിൽനിന്ന് നാട്ടിലേക്കുള്ള ടിക്കറ്റ് നിരക്ക് വിമാനക്കമ്പനികൾ കുത്തനെ കൂട്ടിയത് പ്രവാസികൾക്ക് തിരിച്ചടിയായി. ദുബായ്, ഷാർജ എന്നിവിടങ്ങളിൽനിന്ന് കണ്ണൂരിലേക്കുള്ള ടിക്കറ്റ് നിരക്ക് ഇരട്ടിയോളമാണ് ഉയർന്നത്. നാട്ടിലെത്താനിരിക്കുന്ന പ്രവാസികളെ പിഴിയുന്ന സമീപനമാണ് വിമാനക്കമ്പനികളുടെതെന്ന് പരാതിയുയർന്നു കഴിഞ്ഞു .
ജൂലായിലാണ് യു.എ.ഇ.യിലെ സ്‌കൂളുകൾ മധ്യവേനലവധിക്ക് അടയ്ക്കുന്നത്. ഇതോടൊപ്പം ബക്രീദ് സീസണും മുന്നിൽക്കണ്ടാണ് വിമാനക്കമ്പനികൾ നിരക്കുയർത്തിയത്.
ജൂലായ് ആദ്യവാരം ഷാർജ, ദുബായ് എന്നിവിടങ്ങളിൽനിന്ന് കണ്ണൂരിലേക്ക് 40,000 രൂപയ്ക്ക് മുകളിലാണ് നിരക്ക്. സാധാരണ ഇത് 20,000 രൂപയ്ക്ക് താഴെയാണ് വരാറുള്ളത്. എല്ലാ വർഷവും ഈ സീസണിൽ വിമാനക്കമ്പനികൾ ടിക്കറ്റ് നിരക്ക് ഉയർത്താറുണ്ടെന്ന് ട്രാവൽ ഏജൻസി ഉടമകൾ പറഞ്ഞു.
സർവീസുകൾ കുറവായതിനാൽ കേരളത്തിലെ മറ്റു വിമാനത്താവളങ്ങളെക്കാൾ കണ്ണൂരിൽ ടിക്കറ്റ് നിരക്ക് അധികമാണ്. ഈ മാസം അബുദാബി, മസ്‌കറ്റ് സെക്ടറുകളിലേക്ക് കൂടുതൽ സർവീസ് തുടങ്ങിയിട്ടുണ്ട്. ഇതോടെ അങ്ങോട്ടുള്ള ടിക്കറ്റ് നിരക്കിലും കുറവുവന്നിരുന്നു. ഇൻഡിഗോ, എയർ ഇന്ത്യ കമ്പനികളാണ് ദോഹ, അബുദാബി, മസ്‌കറ്റ് എന്നിവിടങ്ങളിലേക്ക് പുതുതായി സർവീസുകൾ തുടങ്ങിയത്.
ആഭ്യന്തര സെക്ടറിൽ | കൂടുതൽ യാത്രക്കാരുള്ള ബെംഗളൂരുവിലേക്കും ഇൻഡിഗോ അധിക സർവീസുകൾ തുടങ്ങിയിട്ടുണ്ട്.