പുതിയ അധ്യയനവർഷത്തിന് ബുധനാഴ്ച തുടക്കമാകുന്പോൾ ഒന്നാം ക്ലാസിലേക്ക് എത്തുന്നത് നാലുലക്ഷത്തോളം കുരുന്നുകൾ. കോവിഡ് മഹാമാരിയുടെ അതിതീവ്രത പിന്നിട്ടശേഷമുള്ള ആദ്യ അധ്യയനവർത്തിൽ വിദ്യാർഥികൾക്കും അധ്യാപകർക്കും മാസ്ക് നിർബന്ധമാണ്.
പ്രവേശനോത്സവത്തിന്റെ സംസ്ഥാന തല ഉദ്ഘാടനം തിരുവനന്തപുരം കഴക്കൂട്ടം ഗവ. ഹയർസെക്കൻഡറി സ്കൂളിൽ ഇന്നു രാവിലെ 9.30ന് മുഖ്യമന്ത്രി പിണറായി വിജയൻ നിർവഹിക്കും. ഒന്നു മുതൽ പ്ലസ് ടുവരെയുള്ള ക്ലാസുകളിലായി സംസ്ഥാനത്ത് 42.9 ലക്ഷം വിദ്യാർഥികളും 1.8 ലക്ഷം അധ്യാപകരുമാണ് സംസ്ഥാനത്തെ സ്കൂളുകളിൽ എത്തിച്ചേരുക.
വിദ്യാർഥികൾക്കായുള്ള ഒന്നാം ഭാഗം പാഠപുസ്തകങ്ങളും കൈത്തറി യൂണിഫോമുകളും എത്തിച്ചിട്ടുള്ളതായി വിദ്യാഭ്യാസ വകുപ്പ് അറിയിച്ചു. സ്കൂളിന് മുന്നിൽ പോലീസ് സഹായം ഉണ്ടാകും. സ്കൂളിന് സമീപം മുന്നറിയിപ്പ് ബോർഡുകൾ, ട്രാഫിക് മുന്നറിയിപ്പുകൾ എന്നിവ സ്ഥാപിക്കണമെന്ന നിർദേശവും നല്കിയിട്ടുണ്ട്.