കണ്ണൂര്‍: വനിതാദിനത്തിൽ വനിതകൾക്കായി കെഎസ്ആർടിസി ഒരുക്കിയ വയനാടന്‍ യാത്ര ശ്രദ്ധേയമായി. വിനോദയാത്രയില്‍ 90 വനിതകളാണ് പങ്കെടുത്തത്. വനിതാ ദിനാഘോഷത്തിന്‍റെ ഭാഗമായി കേക്ക് മുറിച്ച് മധുരം പങ്കിട്ടായിരുന്നു യാത്ര. കുട്ടികൾ മുതൽ പ്രായമായവർവരെ യാത്രയുടെ ഭാഗമായി. യാത്ര തുടങ്ങിയത് മുതല്‍ തന്നെ എല്ലാവരും പരസ്പരം പരിചയപ്പെട്ടു. തുടർന്ന് പാട്ട് പാടിയും നൃത്തംചെയ്തും യാത്ര ആഘോഷമാക്കി.
ഇന്നലെ രാവിലെ ആറിനാണ് കണ്ണൂരില്‍നിന്നു യാത്ര ആരംഭിച്ചത്. ബാണാസുര ഡാം, ട്രീ മ്യൂസിയം, പൂക്കോട് തടാകം, വ്യൂപോയിന്‍റ് എന്നിവിടങ്ങള്‍ സന്ദര്‍ശിച്ചു. കഴിഞ്ഞയാഴ്ച കണ്ണൂര്‍ കെഎസ്ആര്‍ടിസി ഡിപ്പോയിൽനിന്ന് മൂന്നാറിലേക്ക് വിനോദയാത്ര സംഘടിപ്പിച്ചിരുന്നു. ഈ യാത്രയ്ക്ക് മികച്ച പ്രതികരണമാണുണ്ടായത്. ഇതോടെയാണ് വനിതകള്‍ക്കു മാത്രമായി വനിതാദിനത്തിൽ യാത്രയൊരുക്കാൻ കെഎസ്ആര്‍ടിസി തീരുമാനിച്ചത്. യാത്ര പ്രഖ്യാപിച്ചതുമുതല്‍ മികച്ച പ്രതികരണമാണുണ്ടായതെന്ന് ടൂര്‍ കോ-ഓര്‍ഡിനേറ്റര്‍ പറഞ്ഞു. കണ്ണൂര്‍, തലശേരി, പാട്യം, പാനൂര്‍, ഇരിക്കൂര്‍ തുടങ്ങിയ പ്രദേശങ്ങളിലുള്ളവർ വയനാടന്‍ യാത്രയിലുണ്ടായിരുന്നു. ഒരു ബസ് കൂത്തുപറമ്പ് വഴിയും ഒരു ബസ് ഇരിട്ടി വഴിയുമാണ് പോയത്. നാലുനേരത്തെ ഭക്ഷണവും എന്‍ട്രി ഫീസുമുള്‍പ്പെടെ ആയിരം രൂപയായിരുന്നു ടൂര്‍ പാക്കേജ്. 12നാണ് അടുത്ത സംഘം യാത്ര പുറപ്പെടുക.
വനിതാദിനത്തിൽ കെഎസ്ആർടിസിയുടെ വയനാടൻ യാത്ര
