കണ്ണൂർ: സംസ്ഥാന സർക്കാർ വ്യാവസായിക പരിശീലന വകുപ്പിന്റെ ആഭിമുഖ്യത്തിൽ കണ്ണൂർ ഗവ.ഐടിഐയിൽ ജില്ലാ തൊഴിൽ മേള സ്പെക്ട്രം – 2022 എന്ന പേരിൽ സംഘടിപ്പിക്കും. 11ന് രാവിലെ 10ന് ജില്ലാ കളക്ടർ ആർ.ചന്ദ്രശേഖർ ഉദ്ഘാടനം ചെയ്യുമെന്ന് രാമചന്ദ്രൻ കടന്നപ്പള്ളി എംഎൽഎ പത്രസമ്മേളനത്തിൽ അറിയിച്ചു. തൊഴിൽ മേളയിൽ ജില്ലയിലെ 10 സർക്കാർ ഐടിഐകളിലും സ്വകാര്യ ഐടിഐയിലും പഠിച്ചിറങ്ങിയവർക്ക് പ്രയോജനം ലഭിക്കും. ഉത്പാദന- സേവന മേഖലകളിലെ കേരളത്തിനകത്തും പുറത്തുമുള്ള 60 ഓളം പ്രമുഖ വ്യവസായ സ്ഥാപനങ്ങളിൽ 800 ഒഴിവുകളാണ് നിലവിൽ തൊഴിൽമേളയിൽ റിപ്പോർട്ട് ചെയ്തിട്ടുള്ളത്. ഐടിഐകളിൽ പഠിച്ചിറങ്ങിയവർക്കും തൊഴിൽ ദാതാക്കളായ കമ്പനികൾക്കും സ്പെക്ട്രം ജോബ്സ് ഡോട്ട് ഓർഗ് എന്ന സൈറ്റിൽ മുൻകൂട്ടി രജിസ്റ്റർ ചെയ്യാം. സ്പോട്ട് രജിസ്ട്രേഷനും സൗകര്യം ഉണ്ട്. കൂടുതൽ വിവരം 8089238825 നമ്പറിലും ലഭിക്കും. പത്രസമ്മേളനത്തിൽ തോട്ടട ഐടിഐ പ്രിൻസിപ്പൽ ടി.മനോജ് കുമാർ, വൈസ് പ്രിൻസിപ്പൽ ഗംഗാധരൻ ചക്കരയൻ, മധുസൂദനൻ, എം.പവിത്രൻ എന്നിവരും പങ്കെടുത്തു.