കണ്ണൂർ: നാടിനും ജനങ്ങൾക്കും തണലാവുന്ന വിധം സേവനോന്മുഖ ജനകീയസേനയാക്കി കേരളാ പോലീസിനെ കൂടുതൽ മെച്ചപ്പെടുത്തുകയാണ് സംസ്ഥാന സർക്കാരിന്റെ ലക്ഷ്യമെന്ന് മുഖ്യമന്ത്രി പിണറായി വിജയൻ. പരിയാരത്ത് 1. 81 കോടി രൂപാ ചെലവിൽ നിർമിച്ച പോലീസ് സ്റ്റേഷൻ കെട്ടിടം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
വികസന സമൂഹമെന്ന നിലയിലാണ് കേരളം മുന്നോട്ടു പോകുന്നത്. നാട്ടിലെ സമാധാന ജീവിതം പൂർണതയിലെത്താൻ പോലീസ് സേന കൂടുതൽ മെച്ചപ്പെടണം. അതിന്റെ ഭാഗമാണീ വികസനങ്ങൾ. ക്രമസമാധാന പാലനത്തിൽ നല്ല രീതിയിലാണ് സേനയുടെ പ്രവർത്തനം. പ്രശംസാർഹമായ രീതിയിൽ കുറ്റാന്വേഷണ രംഗത്തും കേരളാ പോലീസ് സജീവമാണ്. തെളിയാത്ത പല കേസുകളും തെളിയുന്നു. കുറ്റവാളികൾ പിടിയിലാകുന്നു.
പുതിയ കാലത്ത് കുറ്റകൃത്യങ്ങളുടെ ഭാവവും രൂപവും മാറി ശാസ്ത്ര സാങ്കേതിക സംവിധാനങ്ങൾ ഉപയോഗിക്കാൻ കുറ്റവാളികൾ ശ്രമിക്കുന്നു. അതിനാൽ കൂടുതൽ സജ്ജമായ കുറ്റാന്വേഷണ സംവിധാനം വേണം. സൈബർ ചതിക്കുഴികൾ പലതരത്തിലാണ് പ്രയോഗിക്കുന്നത്. നാടിന്റെ വികസനവും ക്ഷേമവും പൂർണ തോതിൽ നടക്കുന്നതിന് സമാധാനവും ഐക്യവുമാണ് വേണ്ടത്. അതിന് കേരളാ പോലീസിനെ സുസജ്ജമാക്കുകയാണ് ലക്ഷ്യം- മുഖ്യമന്ത്രി പിണറായി വിജയൻ പറഞ്ഞു.
ബദിയടുക്ക, കുമ്പള എന്നിവിടങ്ങളിലെ ജില്ലാ ഫോറൻസിക് ലാബോറട്ടറികൾ, വിവിധ സ്റ്റേഷനുകളിലെ ശിശു സൗഹൃദ ഇടങ്ങൾ, ക്വാർട്ടേഴ്സുകൾ എന്നിവയുടെ ഉദ്ഘാടനവും മലപ്പുറം ജില്ലാ പോലീസ് കാര്യാലയമടക്കം പതിനാല് വിവിധ കെട്ടിടങ്ങളുടെ തറക്കില്ലടലും മുഖ്യമന്ത്രി പിണറായി വിജയൻ ഓൺലൈനായി നിർവഹിച്ചു.
തദ്ദേശ സ്വയംഭരണ മന്ത്രി എം.വി. ഗോവിന്ദൻ അധ്യക്ഷത വഹിച്ചു. നവകേരള സൃഷ്ടിക്ക് ആഭ്യന്തര സുരക്ഷ അത്യന്താപേക്ഷിതമാണെന്നും അതിനുതകുന്ന വിധത്തിൽ കേരളാ പോലീസ് മാറിയിട്ടുണ്ടെന്നും അദ്ദേഹം പറഞ്ഞു. പോലീസ് സ്റ്റേഷൻ കെട്ടിടം സംബന്ധിച്ച് നാളിതുവരെയുള്ള സങ്കൽപ്പങ്ങളെ മാറ്റിമറിക്കുന്നതാണ് പരിയാരം പോലീസ് സ്റ്റേഷനെന്നും അദ്ദേഹം വ്യക്തമാക്കി.
എം. വിജിൽ എംഎൽഎ മുഖ്യപ്രഭാഷണം നടത്തി. രാജ് മോഹൻ ഉണ്ണിത്താൻ എംപി വിശിഷ്ടാതിഥിയായി. സംസ്ഥാന പോലീസ് മേധാവി അനിൽ കാന്ത്, എഡിജിപി വിജയ് സാക്കറെ, റൂറൽ ജില്ലാ പോലീസ് മേധാവി പി.ബി. രാജീവ്, ജില്ലാ പഞ്ചായത്ത് പ്രസിഡന്റ് പി.പി. ദിവ്യ, കടന്നപ്പള്ളി-പാണപ്പുഴ പഞ്ചായത്ത് പ്രസിഡന്റ് ടി. സുലജ, മുൻ എംപി കെ.കെ. രാഗേഷ്, മുൻ എംഎൽഎ ടി.വി. രാജേഷ്, വാർഡംഗം വി.എ. കോമളവല്ലി, കെപിഒഎ ജോയിൻ സെക്രട്ടറി രമേശൻ വെള്ളോറ, കെപിഎ സെക്രട്ടറി എ. പ്രിയേഷ് തുടങ്ങിയവർ പങ്കെടുത്തു.