കണ്ണൂർ: വീട്ടിൽ സ്വർണവും പണവും വച്ച് ദൂരദേശത്തേക്ക് പോകുന്നവർ ജാഗ്രതൈ. തമിഴ്നാട്ടിൽനിന്നുള്ള മോഷണസംഘം ജില്ലയിൽ തമ്പടിച്ചിരിക്കുന്നതായി പോലീസ്. അഞ്ചു പേരുടെ ലുക്ക് ഔട്ട് നോട്ടീസാണ് പോലീസ് പുറത്തുവിട്ടിട്ടുള്ളത്. തമിഴ്നാട്ടിൽ നിരവധി മോഷണക്കേസുകളിൽ പ്രതികളായവരാണ് ജില്ലയിലെത്തി ഒളിവിൽ കഴിയുന്നത്.
മലയോര മേഖലകളിലോ ഉൾനാടൻ പ്രദേശങ്ങളിലോ ആയിരിക്കും ഇവരുടെ ഒളിസങ്കേതമെന്നാണ് പോലീസിന്റെ കണക്കുകൂട്ടൽ. അതുകൊണ്ടുതന്നെ വരുംദിവസങ്ങളിൽ ഇവിടങ്ങളിൽ വ്യാപക പരിശോധനയ്ക്കൊരുങ്ങുകയാണ് പോലീസ്. പൂട്ടിക്കിടക്കുന്ന വീടുകളും തനിച്ചു താമസിക്കുന്ന സ്ത്രീകളെയും കേന്ദ്രീകരിച്ചാണ് ഇവർ പ്രധാനമായും മോഷണം നടത്തുന്നത്. വലിയ മോഷണങ്ങൾ മാത്രമേ ഇവർ നടത്തൂ. പ്രതികളുമായി സാമ്യം തോന്നുന്നവരെ കണ്ടാലുടൻ അടുത്തുള്ള പോലീസ് സ്റ്റേഷനുമായി ബന്ധപ്പെടണമെന്നാണ് പോലീസ് നൽകുന്ന മുന്നറിയിപ്പ്.