കണ്ണൂർ: കൃത്രിമ ജലപാത കടന്നുപോകുന്ന പ്രദേശങ്ങളിലെ ദുരിതങ്ങളും പ്രയാസങ്ങളും മനസിലാക്കി റിപ്പോർട്ട് നൽകുന്നതിന് യുഡിഎഫ് സംസ്ഥാന കമ്മിറ്റി നിയോഗിച്ച ഉപസമിതി പദ്ധതി പ്രദേശങ്ങളിൽ സന്ദർശനം നടത്തി. സണ്ണി ജോസഫ് എംഎൽഎയുടെ നേതൃത്വത്തിലുള്ള സംഘമാണ് ജില്ലയിലെ വിവിധ പ്രദേശങ്ങൾ സന്ദർശിച്ചത്. ഓരോ പ്രദേശങ്ങളിലും വീടുകളും കിടപ്പാടങ്ങളും കൃഷിസ്ഥലങ്ങളും വസ്തുവകകളും നഷ്ടപ്പെടുന്ന നൂറുകണക്കിന് സ്ത്രീ പുരുഷൻമാരാണ് കക്ഷിരാഷ്ട്രീയ ഭേദമന്യേ സംഘത്തിന് മുമ്പാകെ പരാതി പറയാനെത്തിയതെന്ന് യുഡിഎഫ് സംഘം പറഞ്ഞു.
മതുക്കോത്ത് നിന്ന് ആരംഭിച്ച സന്ദർശനം പാനൂരിൽ സമാപിച്ചു. ചേലോറ വയൽ, കാപ്പാട്, ആറ്റടപ്പ, ചാല, കോറ്റംകുന്ന്, പനോന്തേരി അയ്യപ്പക്ഷേത്രം, ആനപ്പാലം, ഇല്ലിക്കുന്ന് തുടങ്ങിയ സ്ഥലങ്ങളിൽ സംഘം സന്ദർശനം നടത്തി. സമിതി ഫെബ്രുവരി 18 ന് മുമ്പ് റിപ്പോർട്ട് സമർപ്പിക്കും. മുസ്ലിം ലീഗ് ജില്ലാ ജനറൽ സെക്രട്ടരി അബ്ദുൽ കരീംചേലേരി, യുഡിഎഫ് ജില്ലാ ചെയർമാൻ പി.ടി. മാത്യു, സി.എ.അജീർ എന്നിവരും സംഘത്തിലുണ്ടായിരുന്നു.